راولپنڈی (نیوزڈیسک) تحریک انصاف کے رہنما اسد قیصر نے کہا ہے کہ وزارتِ عظمی کے لیے عمر ایوب ہمارے امیدوار ہوں گے۔اسد قیصر اسلام آباد ہائی کورٹ کی جانب سے اجازت ملنے پر بانی پی ٹی آئی سے ملاقات کی جس میں موجودہ سیاسی صورتحال اور اتحادیوں سے متعلق بات کی۔انہوں نے بانی پی ٹی آئی سے ملاقات کے بعد اڈیالہ جیل کے باہر میڈیا سے گفتگو کرتے ہوئے کہا کہ تمام سیاسی جماعتوں کے ساتھ بات کرنے کا ٹاسک دیا گیا ہے، الیکشن میں دھاندلی کے خلاف احتجاج کرنے والی جماعتوں سے رابطہ کریں گے۔
پی ٹی آئی رہنما نے کہا کہ جے یو آئی، اے این پی، جماعت اسلامی اور قوم پرست جماعتیں سب سے بات کریں گے۔اسد قیصر نے کہا کہ 10ماہ بعد بانی پی ٹی آئی سے ملاقات ہوئی ہے، بانی پی ٹی آئی نے عمر ایوب کو نامزد کیا ہے، وہی وزیراعظم ہوگا، بانی پی پی ٹی احتجاجی تحریک سے متعلق لائحہ عمل دیں گے۔

انہوں نے کہا کہ ملکی تاریخ کے بدترین انتخابات ہیں، ہمارا مینڈیٹ چوری کیا گیا۔

اسد قیصر نے کہا کہ ہم کسی کو مستعفی نہیں کرائیں گے، ہم اسمبلی میں بیٹھیں گے اور ہم قانونی جنگ لڑیں گے، پارلیمانی پارٹی کا اجلاس ایک دو دن میں بلائیں گے، اس پر بات چل رہی ہے۔پی ٹی آئی رہنما نے کہا کہ ہم امریکا کو ان کی ذمے داری کی یاد دلا رہے ہیں، چیف جسٹس سے بھی اپیل کرتے ہیں کہ ملک میں قانون کو اوپر لایا جائے۔انہوں نے کہا کہ ہمارا لیڈر بانی پی ٹی آئی ہے اور اسی کا فیصلہ تسلیم کیا جائے گا۔
پی ٹی آئی رہنما نے کہا کہ مجھے اسائنمنٹ دی گئی ہے کہ تمام سیاسی جماعتوں کو انگیج کروں، ٹاسک ملا ہے کہ انتخابات میں دھاندلی کے خلاف احتجاج کرنے والی تمام جماعتوں سے رابطہ کروں۔اسد قیصر نے کہا کہ مولانا فضل الرحمن، اے این پی، آفتاب شیرپا، قوم پرست اور اسلامی جماعتوں سب سے رابطہ کریں گے، ہم چاہتے ہیں کہ مینڈیٹ چوری کے خلاف آپس میں مل کر حکمت عملی بنائیں۔
اسد قیصر نے کہا کہ پاکستان کی تاریخ کا سب سے بدترین اور دھاندلی زدہ الیکشن ہوا ہے، اس الیکشن کو نہ پاکستان میں کوئی مان رہا ہے نہ دنیا میں اس کی کوئی ساکھ ہے، عالمی سطح پر بھی اس الیکشن کو سنجیدگی سے نہیں لیا گیا۔اس موقع پر گفتگو کرتے ہوئے تحریک انصاف کے رہنما بیرسٹر سیف نے کہا کہ بانی پی ٹی آئی کا پیغام ہے امریکا نے ہر دور میں آمروں کی سرپرستی کی ہے۔
بیرسٹر سیف نے کہا کہ امریکا نے آمروں کی یا پھر کرپٹ لوگوں کی سپورٹ کی ہے، بانی پی ٹی آئی کا پیغام ہے کہ امریکا الیکشن میں دھاندلی پر نظر رکھے اور آواز اٹھائے۔بیرسٹر سیف نے کہا کہ امریکا کا پاکستان کے الیکشن سے متعلق بیان کاسمیٹک قسم کا ہے۔بیرسٹر سیف نے کہا کہ اسد قیصر کے بھائی عاقب اللہ کو خیبرپختونخوا میں اسپیکر کے لیے نامزد کیا گیا ہے، انتخابات پر جس طرح امریکا کو آواز بلند کرنی چاہیے تھی اس طرح نہیں کی۔
بیرسٹر سیف نے کہا کہ امریکا نے ہمیشہ ڈکٹیٹرز کی پشت پناہی کی اور کرپٹ لوگوں کو سپورٹ کیا، بانی پی ٹی آئی نے پیغام دیا ہے کہ امریکا کے پاس موقع ہے اپنی غلطیوں کا ازالہ کرے۔انہوں نے کہا کہ امریکا پوری دنیا میں جمہوریت کا دعویدار ہے اس پر اپنا کردار ادا کرے۔