اسلام آباد (نیوزڈیسک) سپریم کورٹ آف پاکستان میں الیکشن کو کالعدم قرار دینے کی درخواست پر سماعت کل ہوگی۔ میڈیا کے مطابق سپریم کورٹ میں عام انتخابات 2024 کو کالعدم قرار دینے کی درخواست پر کل 21 فروری بدھ کو سماعت ہوگی، چیف جسٹس قاضی فائز عیسیٰ کی سربراہی میں تین رکنی بنچ سماعت کرے گا، بنچ میں جسٹس محمد علی مظہراور جسٹس مسرت ہلالی شامل ہوں گے۔
سپریم کورٹ نے درخواستگزار بریگیڈیئر ریٹائرڈ علی کو طلبی کا نوٹس جاری کررکھا ہے۔ بریگیڈیئر ریٹائرڈ علی خان نے انتخابات میں دھاندلی کی تحقیقات اور ملک میں دوبارہ انتخابات کرانے استدعا کی گئی تھی۔ چیف جسٹس قاضی فائز عیسیٰ کی سربراہی میں تین رکنی بینچ جس میں جسٹس محمد علی مظہر اور جسٹس مسرت ہلالی بھی شامل ہیں کیس کی سماعت کی تھی۔

لیکن یاد رہے گزشتہ روز سماعت کے آغاز میں عدالت کو بتایا گیا تھا کہ انتخابات کالعدم قرار دیکر دوبارہ کرانے کی درخواست واپس لے لی گئی جبکہ چیف جسٹس کا کہنا تھا کہ کیس ہر صورت سنیں گے، درخواست گزار کو عدالت میں پیش کیا جائے۔دوران سماعت چیف جسٹس پاکستان قاضی فائز عیسیٰ نے استفسار کیا درخواست گزار علی خان کہاں ہیں؟ جبکہ جسٹس محمد علی مظہر نے کہا درخواست گزار نے تو 13 فروری کو درخواست واپس لینے کی اپیل کر دی تھی۔
عدالتی معاون نے بتایا کہ درخواست گزار سے نوٹس کی تعمیل کیلئے فون اور ایڈریس پر رابطے کی کوشش کی تھی، جس پر چیف جسٹس پاکستان نے ریمارکس دئیے کہ پہلے درخواست دائر کرتے ہیں اور پھر غائب ہو جاتے ہیں، یہ کیا محض تشہیر کیلئے درخواست دائر کی گئی تھی؟جسٹس قاضی فائز عیسیٰ نے کہا درخواست گزار کو کسی بھی طرح پیش کریں، یہ کیس چلائیں گے، درخواست گزار نے درخواست دائر کرتے ہی خود میڈیا پر جاری کر دی تھی جبکہ جسٹس مسرت ہلالی نے کہا کہ انتخابات سے متعلق درخواست ٹیلی ویژن کیلئے دائر ہوئی تھی۔
بعد ازاں سپریم کورٹ نے انتخابات کالعدم قراردینے کی درخواست پر سماعت 21 فروری تک ملتوی کردی تھی۔ دوسری جانب آج عام انتخابات میں دھاندلی کے الزامات کی تحقیقات کیلئے جوڈیشل انکوائری کرنے کیلئے سپریم کورٹ میں درخواست دائرکر دی گئی ہے، شہری شبیر اسماعیل نے اظہر صدیق ایڈووکیٹ کی وساطت سے درخواست سپریم کورٹ لاہور رجسٹری میں دائر کی۔
جس میں الیکشن کمیشن، وفاقی حکومت سمیت دیگر کو فریق بنایا گیا ہے۔درخواست میں استدعا کی گئی ہے کہ الیکشن میں مبینہ دھاندلی کی تحقیقات جوڈیشل انکوائری کے ذریعے کروائی جائے۔ 8فروری کوہونے والے الیکشن کے نتائج کے بعد بیشتر سیاسی جماعتوں کی جانب سے الزامات عائد کئے گئے تھے کہ مبینہ طور پر الیکشن میں دھاندلی ہوئی ہے اور اس حوالے سے دھاندلی کی شکایات پاکستان تحریک انصاف، اے این پی، جے یو آئی، جماعت اسلامی، نیشنل پارٹی اور دیگر جماعتوں نے کی تھی جبکہ پی ٹی آئی سمیت دیگر جماعتوں نے ملک بھر میں مظاہرے اور ریلیاں نکال کر اپنا الیکشن کمیشن کو اپنا احتجاج ریکارڈ کروایا تھا۔