اسلام آباد(نیوزڈیسک) پاکستان تحریک انصاف کے رہنماءشیر افضل مروت نے کہا ہے کہ ہمارا مینڈیٹ نہیں ملا تو یہ چین سے حکومت نہیں کر پائیں گے،بانی پی ٹی آئی نے بارہا کہا ہے کہ فوج کے ساتھ کسی مقام پر اختلاف نہیں۔اسلام آباد ہائیکورٹ کے باہر میڈیا سے گفتگو کرتے ہوئے ان کا کہنا تھا کہ ہم نے اپنے کنونشن میں بھی فوج کو خراج تحسین پیش کیا تھا، بہت ساری چیزوں پر ہمارا انحصار فوج پر ہے۔
فوج بارڈر پر لڑتی ہے اور اپنی جانوں کا نظرانہ ملک و قوم کیلئے پیش کرتی ہے۔انہوں نے کہا کہ یہ ذہن سے نکال دیں کہ ہم فوج کےخلاف منافرت پھیلانے کی کوشش کریں گے۔رہنما پی ٹی آئی نے کہا کہ ہمارے انٹرا پارٹی انتخابات 15 دن کے اندر ہو رہے ہیں، ہمیں اپنی پارٹی کو متحرک کرنا ہے، تمام پی ٹی آئی ورکرز اس بار انتخابات میں حصہ لیں گے، جو ہمارے پلیٹ فارم سے لڑنا چاہتے ہیں ان کو سپورٹ کروں گا۔

رہنماءپی ٹی آئی کامزید کہنا تھاکہ الیکشن میں ہماری سیٹیں چھیننے کے پیچھے الیکشن کمیشن ملوث ہے، الیکشن کمیشن میں ہمارے مقدمات آئے روز تعطل کا شکار ہو رہے ہیں۔الیکشن کمیشن دھاندلی کے متعلق ہماری سنوائی نہیں کررہا ہے ۔ہمارے پاس الیکشن میں ہونے والی دھاندلی کے مکمل ثبوت ہیں ۔شیر افضل مروت کا گفتگو کے دوران مزید کہنا تھا کہ ہمارا مینڈیٹ سیاسی جماعتوں نے چوری کیا ہے، سیاسی جماعتوں کے سہولت کار الیکشن کمیشن اور آر اوز ہیں۔
ہماری جنگ پارلیمان کے اندر اور باہر جاری رہے گی۔انہوں نے کہا کہ جسٹس سردار اعجاز اسحاق کی عدالت میں میرے گھر پر ریڈ کا کیس ہوا، کل میرا ملازم گھر واپس آگیا تھا اور میری اس سے گفتگو ہوئی۔میری داد رسی ہونے پر عدالت نے درخواست کو نمٹا دیا ہے۔میرے ملازم نے بتایااسے دو جوڑے کپڑے بھی دئیے گئے ہیں۔