لاہور(نیوزڈیسک) پنجاب میں بجلی چوری ،سمگلنگ اور ذخیرہ اندوزی کیخلاف صوبے بھر میں گرینڈ آپریشن کا فیصلہ کر لیاگیا،وزیراعلیٰ پنجاب مریم نواز کی زیرِ صدارت ہونے والے اجلاس میں بجلی چوری کے خاتمے کیلئے اہداف کا تعین اور ایک ماہ کی ڈیڈ لائن مقرر کی گئی۔وزیرِ اعلیٰ پنجاب نے وزیرِ اعظم شہباز شریف کے گزشتہ روز کے اجلاس کی روشنی میں پالیسی پر عمل درآمد کا حکم دیدیا۔
اجلاس میں بجلی چوری کے خاتمے، سخت سزاﺅں اور بھاری جرمانوں کیلئے قانون سازی کا بھی فیصلہ کرتے ہوئے کہا گیا کہ بجلی چوری پہلے ہی قابل دست اندازی جرم ہے، گرفتاریاں اور فوری سزائیں دی جائیں، بجلی چوری میں ملوث سرکاری حکام کے خلاف بھی کارروائی ہو گی۔وزیرِ اعلیٰ پنجاب نے ہدایت کرتے ہوئے کہا کہ بجلی چوری، اسمگلنگ اور ذخیرہ اندوزی کے خلاف زیر ٹالرنس پالیسی اپنائی جائے، بجلی چور، اسمگلنگ، ذخیرہ اندوزی میں ملوث افراد کے خلاف کوئی رعایت نہ کی جائے۔

اجلاس میں فیصلہ کیا گیا کہ صنعتوں، کارخانوں، دکانوں، گھروں اور شاپنگ مالز سمیت ہر کنکشن چیک ہو گا۔واضح رہے کہ گزشتہ روز وزیر اعظم شہباز شریف کی زیر صدارت اجلاس میں انسداد بجلی چوری پالیسی، بجلی کی تقسیم کار کمپنیوں کی جدید بنیادوں پر تشکیل نو، بجلی چوری کے مکمل خاتمے کیلئے سمارٹ میٹرز کی تنصیب اور کرپٹ افسران کے خلاف سخت کارروائی کے احکامات پر وفاق اور صوبائی حکومتوں کے درمیان معاہدوں کی منظوری دے دی گئی تھی۔
وزیر اعظم آفس کے میڈیا ونگ سے جاری پریس ریلیز کے مطابق وزیراعظم شہباز شریف کی زیر صدارت غیر قانونی سرگرمیوں کے دائرے کے خلاف اقدامات کے حوالے سے اجلاس منعقد ہوا تھا۔جس میں وفاقی کابینہ کے اراکین، چیف آف آرمی اسٹاف، صوبائی وزرائے اعلیٰ اور اعلیٰ سطح کے حکام نے شرکت کی۔اجلاس کا ایجنڈا جرائم پیشہ مافیا اور غیر قانونی سرگرمیوں کے خلاف اقدامات تھے۔