اسلام آباد(نیوزڈیسک) وفاقی وزیر اقتصادی امور احد چیمہ کا کہنا ہے کہ حکومت اے ڈی بی کی سفارشات پر عمل کرنے کیلئے پرعزم ہے، ایشیائی ترقیاتی بینک کی آؤٹ لک رپورٹ حکومت کی درست اقتصادی پالیسیوں کی مضبوط توثیق ہے۔ اپنے ایک بیان میں انہوں نے کہا کہ آوٹ لُک رپورٹ 2024 میں پاکستان کی معیشت کے بارے میں خوش آئند امکانات کا اظہار کیا گیا ہے۔
احد چیمہ نے کہا کہ ہم ایک ایسی معیشت بنانے کیلئے کام جاری رکھیں گے جس میں تمام پاکستانیوں کیلئے مواقع دستیاب ہوں۔انہوں نے مزید کہا کہ ہم مالی نظم و ضبط کو بہتر بنانے، سرمایہ کاری کے فروغ اور کاروباری ماحول کو آسان بنانے کے لیے کام کررہے ہیں، ہماری پچھلی 16 ماہ کی حکومت میں ملک کی معاشی طور پر مستحکم بنانے کے لیے ضروری اقدامات اٹھائے گئے۔

احد چیمہ کامزید کہنا تھا کہ وزیراعظم شہبازشریف کی قیادت میں ہم نے ایک مستحکم اور پائیدار معیشت کے لیے کام شروع کردیا، ملک میں مہنگائی کم ہو رہی ہے، اس کی تصدیق عالمی مالیاتی ادارے بھی کررہے ہیں۔وفاقی وزیر اقتصادی امور نے یہ بھی کہا کہ کہا کہ ہم نے ملک کو ڈیفالٹ سے بچایا، ہمارے معاشی اقدامات سے روپے کی قدر مستحکم ہوئی، پاکستان کا زرعی شعبہ مضبوط ہے اور اس میں اضافی ترقی کی صلاحیت موجود ہے، حکومت اے ڈی بی کی سفارشات پرعمل کرنے کے لیے پرعزم ہے۔
خیال رہے کہ ایشیائی ترقیاتی بینک (اے ڈی بی) کی ایشیائی ترقیاتی بینک (اے ڈی بی) نے ایشین ڈویلپمنٹ آؤٹ لُک رپورٹ اپریل 2024 جاری کی ہے جبکہ رپورٹ میں ایشیائی ترقیاتی بینک نے پاکستان کے لئے اقتصادی اصلاحات کو اہم قرار دیا اور رواں مالی سال کے دوران پاکستان کی شرح نمو 1.9 فیصد رہنے کی توقع کا اظہار کیا گیا ہے۔