اسلام آباد (نیوزڈیسک) سعودی عرب سے تعلق رکھنے والے سرمایہ کاروں کا اعلیٰ سطح کا وفد اسلام آباد پہنچ گیا، وزیر اعظم شہباز شریف نے سعودی وفد کے دورہ پاکستان کے انتظامات کے لیے 16 رکنی اسٹیئرنگ کمیٹی تشکیل دے رکھی ہے، اسٹیئرنگ کمیٹی میں مختلف وزارتوں کی نمایندگی موجود ہے۔ تفصیلات کے مطابق وفدکی قیادت سعودی نائب وزیر سرمایہ کاری کر رہے ہیں، وزیر تحارت جام کمال نے ڈاکٹر مصدق ملک کے ہمراہ ہوائی اڈے ہر وفد کا استقبال کیا، ننھے بچوں نے مہمانوں کو بھولوں کے گلدستے پیش کیے، اس موقع پر سعودی سفیر نواف سعید المالکی بھی سفارت خانہ کے حکام کے ہمراہ ائیرپورٹ پر موجود تھے۔
بتایا گیا ہے کہ سعودی اعلیٰ سطح کے وفد میں 40 سے 50 شرکاء شامل ہیں، وفد پاک سعودی سرمایہ کاری کانفرنس میں شریک ہوگا، پاک سعودی سرمایہ کاری کا ابتدائی سیشن پیر کو صبح 8 بجے شروع ہوگا، پاکستانی حکام سعودی وفد کو متوقع سرمایہ کاری شعبوں پر بریفنگ دیں گے، سعودی نائب وزیر سرمایہ کاری پاک سعودی سرمایہ کاری کانفرنس کے ابتدائی سیشن سے خطاب کریں گے، پاکستانی وزیر تجارت بھی ابتدائی سیشن کے اختتام پر سے خطاب کریں گے، اس کے علاوہ دورے کے دوران پاکستان اور سعودی عرب کے درمیان کئی بزنس ٹو بزنس ملاقاتیں بھی شیڈیول ہیں۔

معلوم ہوا ہے کہ سعودی تجارتی وفد میں مختلف شعبوں سے تعلق رکھنے والی 30 کمپنیوں کے نمائندے شامل ہیں، سعودی وفد کا تعلق ٹیکنالوجی، توانائی، ہوا بازی، تعمیرات، مائننگ اور ہیومن ریسورسز کے شعبوں سے ہے، وفد کے دورے میں آئی ٹی، توانائی، خوراک، کیمیکل، گوشت، کان کنی، زراعت، صنعت و تجارت وغیرہ کے مشترکہ منصوبوں میں متوقع سرمایہ کاری کے معاملے پر بات چیت ہوگی۔
بتایا جارہا ہے کہ سعودی وفد کے دورے کے دوران دونوں ممالک کے مابین متعدد معاہدوں و مفاہمتی یاداشتیں متوقع ہیں، سعودی وفد کے ساتھ ونڈ اور سولر توانائی کے منصوبوں میں سرمایہ کاری پر بھی تبادلہ خیال ہوگا، اس کے علاوہ ریکوڈک منصوبے پر بات چیت کی جائے گی، سعودی عرب کی جانب سے پاکستان میں 10 ارب ڈالرز سے زائد سرمایہ کاری کی توقع ہے، سعودی وفد 7 مئی کو واپس روانہ ہوگا۔