اسلام آباد(نیوزڈیسک) وزیر داخلہ کی چینی شہریوں سمیت غیر ملکیوں کی حفاظت کیلئے سکیورٹی پلان پر من و عن عملدرآمد کی ہدایت،سکیورٹی پلان پر عمل میں کسی قسم کی غفلت برداشت نہیں کی جائیگی،وفاقی وزیر داخلہ محسن نقوی کی زیرصدارت وزارت داخلہ میں اہم اجلاس ہوا جس میں وفاقی سیکرٹری داخلہ خرم علی آغا، سربراہ نیکٹا محمد طاہر رائے، کوآرڈی نیٹر نیشنل ایکشن پلان، متعلقہ اداروں اور وزارت داخلہ کے سینئر حکام نے شرکت کی۔
اجلاس میں غیر ملکیوں خصوصاً چینی شہریوں کی حفاظت کیلئے کئے گئے اقدامات کا جائزہ لیا گیا۔وفاقی وزیر داخلہ کو وزارت داخلہ سمیت متعلقہ اداروں کی جانب سے سکیورٹی پلان اور مجموعی صورتحال پر بریفنگ دی گئی۔محسن نقوی کی زیر صدارت اجلاس میں ملک میں سکیورٹی کی مجموعی صورتحال پر بھی غور کیا گیا اور وفاقی وزیر داخلہ نے سکیورٹی پلان کے ایس او پیز پر من و عن عملدرآمد کی ہدایت کی۔
اس موقع پر محسن نقوی کا کہنا تھا کہ وضع کردہ پلان کی ہر سطح پر باقاعدہ مانیٹرنگ کی جائے۔ ملک دشمن عناصر کے مذموم عزائم خاک میں ملانے کیلئے متعلقہ ادارے قریبی رابطہ رکھیں۔ سکیورٹی پلان پر عمل میں کسی قسم کی غفلت کی گنجائش نہیں۔خیال رہے کہ اسلام آباد میں محسن نقوی کی زیرصدارت نیشنل ایکشن پلان عمل درآمد جائزہ کمیٹی کا اجلاس ہواتھا۔
وفاقی وزیر داخلہ محسن نقوی نے کہا کہ پولیس سمیت تمام سکیورٹی ادارے چینی شہریوں کی حفاظت کے ایس اوپیز پر 100 فیصدعملدرآمد یقینی بنائیں۔ کسی قسم کی کوتاہی برداشت نہیں کی جائے گی، غفلت پر سخت تادیبی کارروائی کی جائے گی۔ جس میں سیکرٹری داخلہ، سربراہ نیکٹا، ڈی جی ایف آئی اے، صوبائی آئی جیز اور سیکرٹریز داخلہ نے شرکت کی تھی۔اجلاس میں پاکستان بھر میں پولیس کو جدید ٹیکنالوجی دینے کے بارے بریفنگ دی گئی تھی۔
ملکی پولیس کو نئی ٹیکنالوجی فراہم کرنے اور چینی شہریوں کی سکیورٹی سے متعلق اقدامات کا بغور جائزہ لیا گیا تھا۔ وفاقی وزیرداخلہ محسن نقوی کا مزید کہناتھاکہ دہشت گردی کے قلع قمع کیلئے ہمیں اپنے اداروں کو جدید ٹیکنالوجی سے لیس کرنا ہوگا، وفاق اس ضمن میں صوبوں کو ہر ممکن تعاون فراہم کرے گا۔