اسلام آباد (نیوزڈیسک) وفاقی دارالحکومت اسلام آباد کی انسداد دہشت گردی عدالت نے وزیر اعلیٰ خیبر پختونخوا علی امین گنڈا پور اور پی ٹی آئی رہنما عامر مغل کی حاضری سے استثنیٰ کی درخواست مسترد کرتے ہوئے دونوں کے ناقابل ضمانت وارنٹ گرفتاری جاری کر دیئے، عدالت نے عمران خان کی ویڈیو لنک پیشی سے متعلق سپرینٹنڈنٹ اڈیالہ جیل سے تحریری جواب بھی طلب کر لیا۔
تفصیلات کے مطابق پاکستان تحریک انصاف کے قائد عمران خان بانی اور دیگر کے خلاف تھانہ سنگجانی اور آئی 9 میں درج مقدمات سے متعلق کیس کی سماعت انسداد دہشت گردی عدالت کے اسلام آباد کے جج طاہر عباس سپرا نے کی، اس موقع پر علی نواز اعوان، واثق قیوم، عامر کیانی اور دیگر ملزمان عدالت میں پیش ہوئے، تاہم وزیر اعلیٰ کے پی علی امین گنڈاپور اور عامر مغل کی جانب سے حاضری سے استثنیٰ کی درخواست کی گئی۔

دوران سماعت جج طاہر عباس سپرا نے ریمارکس دیئے کہ ’کسی کی حاضری سے استثنیٰ کی درخواست قبول نہیں ہوگی، یہ کوئی وجہ نہیں کہ میں شہر سے باہر ہوں تو پیش نہیں ہو سکتا، حاضری پوری نہ ہونا ملزمان پر ہے یا کورٹ پر ہے، اس پر پی ٹی آئی وکلاء نے مؤقف اپنایا کہ ’حاضری پوری کرنا ملزمان پر ہے، جس پر جج نے کہا کہ ’تمام غیر حاضر ملزمان کے وارنٹ گرفتاری جاری ہوں گے، اگلی پیشی پر تمام ملزمان کی حاضری یقینی ہوگی۔
اپنے ریمارکس میں جج طاہر عباس سپرا نے مزید کہا کہ ’تمام غیر حاضر ملزمان کے ناقابل ضمانت وارنٹ گرفتاری جاری کر رہے ہیں، تماشا بنا ہوا ہے ایک آتا ہے دو نہیں آتے، 8 جولائی کو کوئی بیمار ہو، بخار ہے، کچھ بھی ہو جو نہ آیا اسےاشتہاری قرار دیں گے، 8 جولائی کے بعد کیسز کی سماعت روزانہ کی بنیاد پر ہو گی، آئندہ پیشی پر حاضری کی مکمل یقین دہانی کرائی جائے گی تو پھر وارنٹ کا معاملہ دیکھیں گے، اس پر وکلاء صفائی نے استدعا کی کہ ’ایک موقع دیا جائے اگلی پیشی پر تمام ملزمان پیش ہوں گے۔
جس پر جج نے کہا کہ ’میں نے ان کیسز کو انجام تک پہنچانا ہے، جو ملزم 8 تاریخ کو نہیں آئیں گے ان کو اشتہاری قرار دوں گا، عدالتی مفرور کو اشتہاری قرار دینے کیلئے 30 دن ضروری نہیں ہیں، اگر کیسز میں جان ہوئی تو چلیں گے ورنہ فارغ ہوں گے‘، بعد ازاں عدالت نے دونوں مقدمات کی سماعت 8 جولائی تک ملتوی کر دی۔