لاہور (نیوزڈیسک) لاہور ہائیکورٹ کے الیکشن ٹریبونل نے عام انتخابات میں وزیراعلیٰ پنجاب مریم نواز کی کامیابی کے خلاف دائر اپیل پر الیکشن کمیشن کو فارم 45 کا ریکارڈ پیش کرنے کا حکم دے دیا۔ تفصیلات کے مطابق الیکشن ٹریبونل کے جج جسٹس انوار حسین نے حلقہ پی پی 159 سے مریم نواز کے مخالف امیدوار مہر شرافت کی اپیل پر سماعت کی، درخواست گزار نے مؤقف اپنایا کہ ’لاہور کے حلقہ پی پی 159 سے مریم نواز کی جیت کا نوٹی فکیشن حقائق کے برعکس جاری کیا گیا اسے معطل کیا جائے‘، تاہم وزیراعلیٰ پنجاب کے وکلاء کی جانب سے الیکشن اپیل کو ناقابل سماعت قرار دینے کی استدعا کردی گئی، مریم نواز کے وکلاء نے مؤقف اختیار کیا کہ ’الیکشن اپیل قابل سماعت نہیں ہے، قانون کے مطابق اس اپیل کا ٹرائل نہیں ہوسکتا۔

دوران سماعت جسٹس انوار حسین نے ریمارکس دیئے کہ ’ٹریبونل کو کچھ سوالات کے جوابات درکار ہیں وہ نوٹ کرلیں، حلقہ پی پی 159 میں کل کتنے پولنگ سٹیشنز تھے، جس پر وکیل الیکشن کمیشن نے بتایا کہ ’پولنگ سکیم میں رجسٹرڈ پولنگ سٹیشنز کی تعداد 102 ہے، الیکشن ٹریبونل نے استفسار کیا کہ ’فارم 45 پر پریذائیڈنگ افسر کے دستخط ہوں گے دیگر حلقے کے امیدواروں کے پاس بھی وہی فارم ہوگا، پھر فارم 45 ویب سائٹ پر اپلوڈ کیوں نہیں ہوئے، ٹریبونل کی ہدایت کے باوجود الیکشن کمیشن کی جانب سے مریم نواز کے انتخابی حلقے کا ریکارڈ پیش نہیں کیا گیا۔
بتایا گیا ہے کہ الیکشن ٹریبونل جسٹس انوار حسین کے سوالات پر وکیل الیکشن کمیشن نے فارم 45 کا اصل ریکارڈ پیش کرنے کے لیے مہلت مانگ لی، جس پر ٹریبونل نے الیکشن کمیشن کے وکیل کی استدعا کو منظور کرلی اور بعدازاں ٹریبونل کی طرف سے مریم نواز کی انتخابات میں کامیابی کے خلاف اپیل پر مزید سماعت جولائی کے آخری ہفتے تک ملتوی کردی گئی۔