اسلام آباد(نیوزڈیسک) وزیراعظم کے مشیر رانا ثناءاللہ کا کہنا ہے کہ بانی پی ٹی آئی عمران خان پاکستان کے چہرے کو داغدار کرنے پر تلے ہوئے ہیں،پی ٹی آئی کہتی ہے کہ 9 مئی سازش تھی اور وہ ملوث نہیں تو ثبوت لائیں اور آئیں بیٹھ کر بات کریں، ملکی مسائل کا حل صرف اور صرف مذاکرات ہیں، بانی پی ٹی آئی عمران خان کے جیل سے باہر آنے سے کوئی طوفان نہیں آجائے گا۔
ڈان نیوز سے گفتگو کرتے ہوئے رہنماءمسلم لیگ نے کہا ہے کہ بانی پی ٹی آئی کو حق حاصل ہے کہ وہ باہر آنے کی پوری کوشش کریں اسی طرح پراسیکیوشن کو بھی اپنے مقدمات کی پیروی کا حق حاصل ہے۔پی ٹی آئی نو مئی کے واقعات کو سیاسی احتجاج کا رنگ دینا چاہتی ہے اور کہتی ہے نو مئی سازش تھی اور وہ ملوث نہیں بلکہ یہ پلانٹ کیا گیا تو پھر ثبوت دیں کیونکہ ہمارے پاس بھی ثبوت ہیں۔

بانی پی ٹی آئی عمران خان پر تنقید کرتے ہوئے راناثناءاللہ نے کہا کہ ان کی یہ سوچ ہے کہ وہ ہیں تو پاکستان ہے اور وہ نہیں تو پاکستان نہیں ہے تو اس سوچ سے انھیں نکلنا ہو گا۔9 مئی میں پی ٹی آئی نے جولوٹ مار کی اور دفاعی اداروں پر حملہ آور ہوئے اور ملکی تنصیبات کو نقصان پہنچایا تو ہم اس میں ان کی کیا مدد کر سکتے ہیں۔ بانی پی ٹی آئی عمران خان کو اپنے عمل کا مواخذہ اور حساب تو دینا چاہیے اور دینا ہو گا۔
ملکی مسائل کا حل صرف اور صرف مذاکرات ہیں۔واضح رہے کہ وزیراعظم کے مشیر برائے سیاسی امور رانا ثناءاللہ نے چند روز پہلے گفتگو کرتے ہوئے کہا تھا کہ پی ٹی آئی پر پابندی کا معاملہ فی الحال کابینہ میں زیر غور نہیں ہے۔نجی ٹی وی سے گفتگو کرتے ہوئے انہوں نے کہا تھاکہ اگر کسی جماعت کے خلاف پابندی کا کوئی مواد موجود ہے تو اسے پہلے کابینہ میں پیش کیا جائے گا، کابینہ فیصلہ کرے گی تو پھر سپریم کورٹ میں ریفرنس دائر کیا جاسکتا ہے۔انہوں نے مزید کہاتھا کہ پارلیمانی جمہوری سسٹم میں مذاکرات سے مسائل حل ہوتے ہیں جب سے بانی پی ٹی آئی کو مقبولیت ملی تب سے وہ مذاکرات سے انکاری ہیں۔