اسلام آباد(نیوزڈیسک) حکومت نے اووربلنگ کے خاتمے کیلئے بجلی صارفین کی بلنگ پرانے طریقہ کار سے کرنے کا فیصلہ کرلیا،پروریٹا سسٹم ختم کرنے کی تیاری کر لی گئی،وفاقی حکومت نے وزیر توانائی کو پرو ریٹا سسٹم ختم کرنے کی ہدایت کر دی ،بجلی کی تقسیم کار کمپنیوں نے پرو ریٹا سسٹم خفیہ طور پر مارچ سے نافذ کر رکھا تھا۔
اووربلنگ کی شکایات پر حکومت نے تحقیقات کیں جس دوران معلوم ہوا کہ بجلی کے پروٹیکٹڈ صارفین سے اوور بلنگ کی گئی جس میں بجلی کی تمام تقسیم کار کمپنیاں اوور بلنگ میں ملوث نکلیں تھیں وزیراعظم شہباز شریف اور وزیر داخلہ محسن نقوی نے اوور بلنگ کا سخت نوٹس لیا تھا۔یاد رہے کہ گزشتہ روزوفاقی وزیر داخلہ محسن نقوی نے پروٹیکٹیڈ صارفین کو ریلیف دینے کیلئے ڈسکوز کا ڈیٹا طلب کرلیا تھا۔

وزیر داخلہ کا پروٹیکٹیڈ صارفین کو نان پروٹیکٹیڈ کیٹیگری میں شامل کرنے پر تشویش کا اظہارکیا تھا۔ پروٹیکٹیڈ صارفین سے زیادتی کا ازالہ کرنا ضروری ہے۔وفاقی وزیرِ داخلہ محسن نقوی کی زیرِ صدارت پروٹیکٹیڈ صارفین کے حوالے سے اہم اجلاس ہواتھاجس میں وفاقی سیکریٹری داخلہ، ایڈیشنل ڈی جی ایف آئی اے ہیڈکوارٹر اور ایڈیشنل سیکریٹری داخلہ شریک ہوئے جبکہ ایف آئی اے کے تمام ڈائریکٹرز ویڈیو لنک کے ذریعے اجلاس میں شریک ہوئے تھے۔
ایف آئی اے حکام نے اوور بلنگ کے معاملے پروفاقی وزیر داخلہ کو بریفنگ دی تھی۔وفاقی وزیر داخلہ نے پروٹیکٹیڈ صارفین کو نان پروٹیکٹیڈ کیٹیگری میں شامل کرنے پر تشویش کا اظہارکرتے ہوئے پروٹیکٹیڈ صارفین کو ریلیف دینے کیلئے تمام ڈسکوز کا ڈیٹا طلب کرتے ہوئے کہا کہ ایف آئی اے کے تمام ڈائریکٹرز ڈسکوز کے ڈیٹا کو چیک کر کے رپورٹ پیش کریں۔
اجلاس میں محسن نقوی نے بجلی کے پروٹیکٹیڈ صارفین سے اوور بلنگ کا نوٹس لیتے ہوئے 3 روز میں ایف آئی اے ڈائریکٹرز کو تمام شواہد جمع کرنے کی ہدایت کرتے ہوئے کہا کہ تمام شواہد کی جامع رپورٹ وزیرِ اعظم کو پیش کی جائے گی۔اجلاس میں ایڈیشنل ڈی جی ایف آئی اے نارتھ کو پشاور، لاہور، گوجرانوالہ، فیصل آباد جا کر صورتِ حال کا جائزہ لینے اور ڈیٹا جمع کرنے کی ہدایت کی گئی تھی۔