لاہور (نیوزڈیسک) لاہور کی انسداد دہشت گردی کی خصوصی عدالت نے گذشتہ سال 9 مئی کے جلا ئوگھیرا ئوکے واقعات میں پولیس تھانہ شادمان جلانے کے الزام میں درج مقدمے میں شاہ محمود قریشی،یاسمین راشد ،عمر سرفراز چیمہ اور اعجاز چوہدری سمیت 9 ملزمان پر فرد جرم عائد کر دی جبکہ ملزمان نے صحت جرم سے انکار کیا ہے۔

عدالت نے سماعت 18 جولائی تک ملتوی کرتے ہوئے آئندہ سماعت پر استغاثہ کے گواہان کو شہادت کے لئے طلب کر لیا۔انسداد دہشت گردی عدالت کے جج خالد ارشد نے لاہور کی سینٹرل جیل کوٹ لکھپت میں سماعت کی۔سوموار کو سماعت پر پی ٹی آئی رہنما شاہ محمود قریشی کو اڈیالہ جیل سے انسداد دہشت گردی کی خصوصی عدالت میں پیش کیا گیا جبکہ پی ٹی آئی کے دیگر رہنماوں ڈاکٹر یاسمین راشد،عمر سرفراز چیمہ اور اعجاز چوہدری سمیت 9 ملزمان کو بھی پیش کیا گیا اور ان کی حاضری لگائی گئی۔ملزمان کے خلاف تھانہ شادمان میں مقدمہ درج ہے۔