اسلام آباد(نیوزڈیسک) وزیراعظم کے مشیر برائے سیاسی امور رانا ثنا اللہ نے کہا ہے کہ پی ٹی آئی پر پابندی کے حوالے سے حکومت نے ابھی ارادہ ظاہر کیا ہے اور اس حوالے سے آئین پر عمل کیا جائیگا،حکومت آرٹیکل 17کے تحت کسی بھی پارٹی پر پابندی کیلئے ڈکلیریشن دے سکتی ہے کہ اس پارٹی کی ورکنگ ملکی سالمیت کے خلاف ہے اور کابینہ کی منظوری کے بعد یہ ڈکلیریشن سپریم کورٹ میں پیش کیا جائے گا۔
جیو نیوز سے گفتگو کرتے ہوئے رہنماءمسلم لیگ ن کا کہنا تھا کہ اگر عدالت ڈکلیئریشن سے متفق ہوجائے تواس پارٹی پرپابندی عائد ہوجاتی ہے۔ حکومت کا جو بھی فیصلہ ہے وہ آئین کے مطابق ہے اور وزیر اطلاعات نے جو اعلان کیا اس میں آئین کے متعلقہ آرٹیکل 17 کے سب آرٹیکل 2 کا ذکر بھی کیا۔

اگر اس کو پڑھ لیا جاتا تو اس طرح کا شور نہیں ہوتا۔حکومت نے ابھی اپنے ارادے کو ظاہرکیا ہے۔

آئین میں دئیے گئے طریقے کار کے مطابق عمل کیا جائے گا۔ابھی تک کابینہ کے سامنے وہ ڈیکلریشن پیش نہیں کی گئی۔ کابینہ اگر اس نتیجے پر پہنتی ہے کہ ڈیکلریشن سے متعلق شواہد موجود ہیں اور یہ حقائق پر مبنی ہے تو پھر اگلا قدم اٹھایا جائے گا۔ وزیراعظم کے مشیر کا کہنا تھا کہ حکومت کے پاس اس حوالے سے اگر کسی پارٹی کے خلاف اس قسم کی اطلاعات ہوں کہ وہ ملک کے مفادات کے خلاف کوئی کام کررہی ہے تو وہ معلومات کابینہ کے سامنے رکھی جائے گی اور اگر کابینہ منظوری دے گی۔
تو ڈکلیریشن سپریم کورٹ میں پیش کی جائے گی۔رانا ثنااللہ نے مزید کہا کہ مخصوص نشستوں کے معاملے پر عدالت میں اپنا موقف پیش کریں گے اگر مخصوص نشستیں ہمیں مل سکتی ہیں تو آئینی طور پر کوشش کریں گے۔ان کا کہنا تھا کہ ایڈ ہاک ججز رکھنے کا باقاعدہ آئین میں ذکر ہے۔ اگر یہ ٹھیک نہیں توآئین میں کیوں ہے، کسی کے پسند یا ناپسند پر آئینی چیز کو روکا نہیں جاسکتا۔ رہنماءن لیگ نے گفتگو کے دوران کہا کہ ملک میں معاشی بدحالی 2018 کے بعد آئی ہے۔ عمران خان کو لاکر ملک کا بٹھا بٹھایا گیا اور چلتے ملک کو اس صورتحال سے دوچار کیا گیا۔