اسلام آباد(نیوزڈیسک) 190ملین پائونڈز کیس میں بانی پی ٹی آئی عمران خان کے وکیل کی عدم پیشی کی وجہ سے سماعت ملتوی کردی گئی جبکہ بانی پی ٹی آئی کے وکلا نے ان کی بیٹوں سے فون پر بات کرنے سے متعلق درخواست دائر کی جس پر عدالت نے جیل انتظامیہ سے رپورٹ طلب کرلی۔احتساب عدالت اسلام آباد میں نئے تعینات ہونے والے جج ناصر جاوید رانا کے روبرو بانی چیئرمین پی ٹی آئی اور ان کی اہلیہ بشریٰ بی بی کے خلاف 190ملین پائونڈ ریفرنس کی سماعت اڈیالہ جیل میں ہوئی جس میں ریفرنس کے تفتیشی افسر میاں عمر ندیم کے بیان پر جرح نہیں ہو سکی۔
دوران سماعت بشریٰ بی بی کے وکیل عثمان گل نے عدالت کو بتایا کہ بانی پی ٹی آئی کے وکیل ظہیر عباسی چوہدری مصروفیت کے باعث دستیاب نہیں،وکیل دستیاب ہوں گے تو تفتیشی افسر پر جرح کریں گے۔

اس موقع پربانی چیئرمین پی ٹی آئی عمران خان اور بشریٰ بی بی کو کمرہ عدالت میں پیش کیا گیا جبکہ نیب کے پراسیکیوٹر جنرل سردار مظفر عباسی بھی ٹیم کے ساتھ عدالت میں پیش ہوئے۔ دوران سماعت بانی پی ٹی آئی کے وکلا نے ان کی بیٹوں سے فون پر بات کرنے سے متعلق درخواست دائر کی جس پر عدالت نے جیل انتظامیہ سے رپورٹ طلب کرلی۔بعد ازاں عدالت نے 190ملین پائونڈ ریفرنس کی سماعت 7اگست تک ملتوی کردی۔