راولپنڈی (نیوزڈیسک) جماعت اسلامی کے نائب امیر اور مذاکراتی کمیٹی کے سربراہ لیاقت بلوچ نے کہا ہے کہ مذاکرات ہماری خواہش نہیں تھی بلکہ حکومت نے خود رابطہ کیا اور اب حکومت مذاکرات کے بعد عملاً فرار کا راستہ اختیار کر رہی ہے، جماعت اسلامی نے تمام تر مطالبات دے دیے ہیں، حکومت عملدرآمد کروائے، اس بارے میں حکومت کی ٹیکنیکل کمیٹی نے بھی کہا تھا گنجائش موجود ہے۔
راولپنڈی میں دھرنے کے شرکاء سے خطاب کرتے ہوئے انہوں نے کہا کہ جماعت اسلامی کا حق دو دھرنا کامیابی سے جاری ہے، ہمارا یہ دھرنا قومی دھرنے کی حیثیت اختیار کر گیا ہے، اس میں تاجر برادری بڑی تعداد میں شرکت کر رہے ہیں، پینشنرز، نوجوان، طلبہ و طالبات سب ہی اس دھرنے کا حصہ بن رہے ہیں، دھرنے نے عوام میں حوصلہ اور امید پیدا کی ہے، مسلم لیگ ن، پی پی پی، ایم کیو ایم عوام کے مقابلے میں نہیں ٹھہر سکیں گے۔

لیاقت بلوچ کا کہنا ہے کہ عوام کو ریلیف نہ دینے سے حکومت ملک کو انارکی کا شکار کر رہی ہے، ملک میں عدم استحکام ہے اور حکومت کی کہیں بھی رٹ نہیں ہے، قیام پاکستان کے مقاصد سے انخراف کیا جا رہا ہے، پاکستان آئینی اور سیاسی بحران سے دو چار ہے، پارلیمنٹ میں چیزیں بلڈوز کرکے عوام کے دلوں میں ان کا کوئی مقام نہیں، قومی معیشت سے کھلواڑ کیا جارہا ہے، عوام کے خون پسینے کی کمائی ایک مخصوص مراعات یافتہ طبقہ اڑا رہا ہے، ٹیکسوں میں اضافہ سے تمام ملازمین پریشان ہیں، صنعت، تجارت، زراعت پر بوجھ نا قابل برداشت ہیں، ملک کا معاشی پہیہ نہیں چل رہا، قوم کا مطالبہ ہے ان سے مناسب ٹیکس وصول کیا جائے، حکمران طبقہ عیاشیاں ختم کر دے۔
انہوں نے مزید کہا کہ آئی پی پیزکے ساتھ ناقص معاہدوں نے پوری معشیت کو شکنجے میں لے لیا ہے، عوام ان معاہدوں پر نظر ثانی چاہتے ہیں، سی پیک پاک چین دوستی کا ثمر ہے، جماعت اسلامی سی پیک کی حامی ہے، حکومت سی پیک پر اپنی پارٹی سیاست بند کرے، آج دھرنے کا 10 واں روز ہے عوام کی خدمت کے لیے دھرنا جاری ہے، امیر جماعت اسلامی حافظ نعیم الرحمان کراچی پہنچ چکے ہیں، کراچی کے دھرنے میں حافظ نعیم الرحمان پوری قوم سے خطاب کریں گے، پشاور سے تاجر برادری آج تشریف لائے ہیں، سوشل میڈیا پر بھی ہمارا دھرنا ٹاپ ٹرینڈ بن چکا ہے۔