لاہور (نیوزڈیسک) پنجاب حکومت کی جانب سے شروع کی جانے والی ’اپنی چھت اپنا گھر سکیم‘ کی تفصیلات سامنے آگئیں۔ تفصیلات کے مطابق وزیراعلیٰ پنجاب مریم نواز نے اپنی چھت اپنا گھر منصوبے کا افتتاح کردیا ہے، افتتاحی تقریب سے خطاب کرتے ہوئے انہوں نے بتایا کہ شہری علاقوں میں اگر کسی کے پاس ایک سے 5 مرلے اور دیہی علاقے میں ایک سے 10 مرلے کی زمین ہے تو انہیں حکومت پنجاب 15 لاکھ روپے تک قرض دے گی جس کی ادائیگی 7 سال کی آسان قسطوں میں کرنا ہوگی، پہلے 3 مہینے ایک پیسہ بھی نہیں دینا پڑے گا اس کے بعد ہر مہینے 14 ہزار روپے قسط ادا کرنی ہو گی۔
وزیراعلیٰ پنجاب کا بتانا ہے کہ جن کے پاس زمین ہے اور چھت نہیں ہے وہ اس میں اپلائی کرسکتے ہیں، اس قرضے میں بالکل بھی سود شامل نہیں ہے، اس میں کوئی ٹیکس یا کوئی خفیہ چارجز نہیں ہیں، میں نے بینک کو بھی اس میں اس لیے شامل نہیں کیا کیوں کہ اس کے اپنے لوازمات ہوتے ہیں، ہم نے کوشش کی ہے کہ اگر کسی کے پاس اپنا گھر نہیں ہے اور وہ کرایہ ادا کرتے ہیں تو اس کرائے سے کم اس اسکیم کی قسط رکھی جائے، اس سکیم کے لیے ایک نمبر بھی دیا گیا ہے، لوگ آن لائن بھی اپلائی کرسکتے ہیں اور 080009100 پر کال کر کے معلومات حاصل کرسکتے ہیں اور ڈی سی آفس سے بھی معلومات لے سکتے ہیں۔

انہوں نے کہا کہ نواز شریف کو اس سکیم کا سب سے زیادہ انتظار تھا، اپنے دور میں انہوں نے ہاریوں کو گھر دیئے، وہ مجھ سے کہتے تھے کسی کو رہنے کے لیے چھت دے دو تو اس سے بڑے خدمت کوئی نہیں، اپنی چھت اور اپنا گھر سب سے بڑی نعمت ہے، جس کے پاس اپنا گھر ہوتا ہے اس کو اس نعمت کی قدر کم ہوتی ہے، اس خواہش کی شدت ان سے پوچھیں جن کے پاس اپنا گھر نہیں ہوتا، آپ کے پاس سب نعمت ہو لیکن اپنا گھر نہ ہو تو وہ کمی محسوس ہوتی ہے جس کو بیان کرنا مشکل ہے، اس لیے میں وہ سکیم شروع کررہی ہوں جس کا مجھے اور صوبے کے عوام کو بہت انتظار تھا، اس سکیم کے بارے میں مجھ سے بہت سوال کیے جاتے تھے کہ یہ کب آرہی ہے، لوگ انتظار کر رہے تھے، یہ اپنا گھر اپنی چھت کی دوسری سکیم ہے اس کو ہم ابتدائی طور پر 5،6 اضلاع میں شروع کر رہے ہیں لیکن میرا ارادہ ہے کہ اس کو ہم 5 سالوں میں پنجاب کے ہر کونے تک لے جائیں۔