راولپنڈی (نیوزڈیسک) صوبہ خیبرپختونخوا میں ضلع خیبر کے علاقہ وادی تیراہ میں سکیورٹی فورسز نے آپریشن کرتے ہوئے فتنہ الخوارج کے 25 دہشت گردوں کو ہلاک کردیا۔ افواج پاکستان کے شعبہ تعلقات عامہ ( آئی ایس پی آر ) کے مطابق سیکیورٹی فورسز نے ضلع خیبر کے علاقہ تیراہ میں فتنہ الخوارج اور نام نہاد لشکر اسلام اور جماعت الاحرار کے خلاف وسیع پیمانے پر انٹیلی جنس پر مبنی آپریشنز کر رہی ہیں، مضبوط انٹیلی جنس پر مبنی ان کارروائیوں کے نتیجے میں فتنہ الخوارج اور اس سے وابستہ افراد کو بڑا دھچکا لگا ہے۔
آئی ایس پی آر کا کہنا ہے کہ 20 اگست 2024ء سے کی جانے والی ان جرأت مندانہ اور انتہائی کامیاب کارروائیوں کے دوران سیکورٹی فورسز نے اب تک 25 خوارج کو ہلاک کردیا، جن میں خارجی سرغنہ ابوذر عرف صدام بھی شامل ہے، ان کارروائیوں میں 11 دہشت گرد زخمی ہوئے، آپریشن کے دوران 4 بہادر سپاہیوں نے بہادری سے لڑتے ہوئے اپنی جان کی قربانی دی اور شہادت کو گلے لگا لیا، ان کارروائیوں میں فتنہ الخوارج کو پہنچنے والا بھاری نقصان ملک سے دہشت گردی کی لعنت کو ختم کرنے کے لیے سیکیورٹی فورسز کی بہادری اور عزم کا منہ بولتا ثبوت ہے۔

علاوہ ازیں افواج پاکستان کے شعبہ تعلقات عامہ نے بتایا کہ 25 اور 26 اگست 2024ء کی درمیانی شب دہشت گردوں نے بلوچستان میں متعدد گھناؤنی کارروائیاں کرنے کی کوشش کی، دشمن قوتوں کی ایماء پر کی گئی دہشت گردی کی ان بزدلانہ کارروائیوں کا مقصد خاص طور پر موسیٰ خیل، قلات اور لسبیلہ اضلاع میں معصوم شہریوں کو نشانہ بنا کر بلوچستان کے پرامن ماحول اور ترقی کو متاثر کرنا تھا، جس کے نتیجے میں بے شمار بے گناہ شہریوں نے شہادت قبول کی۔
ترجمان پاکستان آرمی نے بتایا کہ ضلع موسیٰ خیل میں دہشت گردوں نے جنرل ایریا راڑہ شام میں ایک بس کو روکا اور بلوچستان میں روزی روٹی کمانے کے لیے کام کرنے والے معصوم شہریوں کو بدنیتی سے نشانہ بنایا، سکیورٹی فورسز اور قانون نافذ کرنے والے اداروں نے فوری طور پر جوابی کارروائی کرتے ہوئے دہشت گردوں کے مذموم عزائم کو کامیابی کے ساتھ ناکام بنایا اور کلیئرنس آپریشنز، مقامی آبادی کی حفاظت اور تحفظ کو یقینی بناتے ہوئے 21 دہشت گردوں کو ہلاک کیا، آپریشن کے دوران پاک فوج کے 10 جوانوں اور قانون نافذ کرنے والے اداروں کے 4 اہلکاروں سمیت 14 بہادر بیٹوں نے بہادری سے لڑتے ہوئے لازوال قربانی دی اور شہادت کو گلے لگا لیا۔
آئی ایس پی آر کا کہنا ہے کہ علاقے میں سینی ٹائزیشن آپریشنز کیے جا رہے ہیں، معصوم شہریوں کو نشانہ بنانے والوں، ان گھناؤنی اور بزدلانہ کارروائیوں کے لیے اکسانے والوں، مجرموں، سہولت کاروں اور حوصلہ افزائی کرنے والوں کو انصاف کے کٹہرے میں لایا جائے گا، پاکستان کی سکیورٹی فورسز اور قانون نافذ کرنے والے ادارے قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔