راولپنڈی (نیوزڈیسک) سکیورٹی فورسز نے خیبر کے علاقے میں دوران آپریشن 12 خارجی دہشتگرد وں کو ہلاک کردیا ہے،دہشتگردوں کے خلاف آپریشن خفیہ اطلاعات پر کیا گیا۔ پاک فوج کے شعبہ تعلقات عامہ آئی ایس پی آر کے مطابق سکیورٹی فورسز نے ضلع خیبر کے علاقے وادی تیراہ میں خفیہ اطلاعات پر آپریشن کیا، 28اور 29اگست کی رات سکیورٹی فورسز نے خارجیوں کے ٹھکانوں کا گھیراؤ کیا۔

آپریشن کے دوران سکیورٹی فورسز اور خارجی دہشتگردوں کے درمیان شدید فائرنگ کا تبادلہ ہوا۔ سکیورٹی فورسز نے شدید فائرنگ کے تبادلے میں فتنہ الخوارج کے 12 خارجی دہشتگرد ہلاک کردیئے۔ 20 اگست سے جاری آپریشنز میں ہلاک خارجیوں کی تعداد 37 ہوگئی ہے، اس دوران آپریشنز میں 14خارجی دہشتگرد شدید زخمی بھی ہوئے۔ آئی ایس پی آر کا کہنا ہے کہ مختلف آپریشنز کے دوران فتنہ الخوارج اور ان کے حامیوں کو بہت بڑا دھچکا لگاہے۔علاقے میں امن اور فتنہ الخوارج کے خاتمے تک آپریشنز جاری رہیں گے۔ سکیورٹی فورسز ملک میں دہشتگردی کے خاتمے کیلئے پرعزم ہیں-