(نیوزڈیسک)اسلام آباد: چیئرمین سینیٹ صادق سنجرانی کے خلاف اپوزیشن کی تحریک عدم اعتماد ناکام ہوگئی ،تحریک کے حق میں صرف 50 ووٹ ڈالے گئے ، جبکہ کامیابی کے لئے 53 ووٹ درکار تھے۔
تفصیلات کے مطابق قائد حزب اختلاف راجہ ظفر الحق نے پریذائیڈنگ افسر بیرسٹر محمد علی سیف کی زیر صدارت سینیٹ اجلاس میں چیئرمین صادق سنجرانی کے خلاف تحریک پیش کی۔ 64 ارکان نے نشستوں سے کھڑے ہوکر قرارداد پیش کرنے کی حمایت کی جس پر بیرسٹر محمد علی سیف نے تحریک پر رائے شماری کی منظوری دے دی۔ رائے شماری خفیہ طریقے سے کرائی گئی اور 100 اراکین نے اپنا حق رائے دہی استعمال کیا جن میں سے 5ووٹ مسترد ہوگئے۔ جماعت اسلامی کے سراج الحق اور سینیٹر مشتاق احمد جبکہ ن لیگ کے چوہدری تنویر ایوان سے غیر حاضر رہے۔ جماعت اسلامی نے چیئرمین سینیٹ کیخلاف تحریک عدم اعتماد میں غیر جانبدار رہنے کا اعلان کیا تھا۔
تحریک عدم اعتماد کی کامیابی کیلئے اپوزیشن کو 53 ارکان کی ضرورت تھی جبکہ تحریک کے حق میں 50 ووٹ ڈالے گئے، جس کے بعد اپوزیشن کی تحریک عدم اعتماد کو مسترد کر دیا گیا۔دوسری جانب چیئرمین سینیٹ صادق سنجرانی کیخلاف عدم اعتماد کی تحریک ناکام ہونے کے بعد ڈپٹی چیئرمین سینیٹ سلیم مانڈوی والا کیخلاف قرارداد پر ووٹنگ ہوئی تاہم اپوزیشن نے ووٹنگ میں حصہ نہ لینے کا فیصلہ کیا۔ تحریک کےحق میں 32 ووٹ آئے جبکہ مخالفت میں 7 ووٹ پڑے۔ جس کے بعد ڈپٹی چیئرمین سینیٹ سلیم مانڈوی والا کے خلاف تحریک عدم اعتماد کو مسترد کرتے ہوئے سینیٹ اجلاس غیر معینہ مدت کے لیے ملتوی کر دیا گیا۔