اسلام آباد (نیوز ڈیسک) عمران خان نے کہا کہ اگر آپ میری مدد نہیں کرتے تو آپ غدار ہیں، آئین میں کہاں لکھا ہے کہ تاحیات توسیع کی آفر کرکے مطالبات منظور کرائیں، سینئر لیگی رہنما اور وفاقی وزیر خواجہ آصف کی گفتگو ۔تفصیلات کے مطابق وزیر دفاع اور پاکستان مسلم لیگ ن کے رہنما خواجہ آصف نے کہا ہے کہ آئین میں کہاں لکھا ہے کہ کسی کو تاحیات توسیع کی آفر کر کے مطالبات منظور کرائیں۔
نجی ٹی وی کے پروگرام میں گفتگوکرتے ہوئے وزیر دفاع خواجہ آصف نے کہا کہ ہم نے کوئی آفر نہیں کی، جب ہمارے نمبر پورے ہوئے عدم اعتماد تحریک لائے۔انہوں نے کہا کہ فوج کا انتخابات کرانے، سیاست میں مداخلت، عدم اعتماد روکنے یا کروانے میں کوئی آئینی کردار نہیں ہے۔

خواجہ آصف نے کہا کہ عمران خان نے کہا کہ اگر آپ میری مدد نہیں کرتے تو آپ غدار ہیں، آپ نیوٹرل ہیں اور نیوٹرل جانور ہوتے ہیں۔

انہوں نے کہا کہ عمران خان دن میں یہ باتیں کہتے تھے اور رات کو ان کے ترلے کرتے تھے۔ انہوں نے کہا کہ ارشد شریف کیس میں عمران خان اور سلمان اقبال کو رضاکارانہ طور پر تحقیقات کا حصہ بن کر معلومات سامنے رکھنی چاہییں، اگر یہ دونوں تحقیقاتی کمیشن میں نہیں آتے تو پھر دال میں کچھ کالا ہے۔ واضح رہے کہ گزشتہ روز پریس کانفرنس کرتے ہوئے پاکستان تحریک انصاف (پی ٹی آئی) کے رہنما اسد عمر نے اس بات کا اعتراف کیا تھا کہ عمران خان نے عدم اعتماد سے پہلے آرمی چیف کی ایکسٹینشن کی بات ضرور کی تھی ، لیکن غیر معینہ مدت کے لیے ایکسٹینشن کی قانون میں کوئی گنجائش نہیں۔
لاہور میں پریس کانفرنس کرتے ہوئے اسد عمر کا کہنا تھا کہ کیا ملک کے سب سے بڑے سیاسی لیڈر کی ساکھ ملکی وحدانیت کے لیے ا ہم نہیں ، شاید دونوں طرف سے سوچنے کی ضرورت ہے ،اس میں کوئی دو رائے نہيں کہ آپ سیاسی نظام میں بہت زيادہ اثر رسوخ رکھتے ہیں، کیا آپ کو کردار ادا کرنےکا کہنا غیر آئینی ہے ؟اچھی خبر ہے کہ فوج آئینی کردار کے اندر رہنا چاہتی ہے، ملاقات میں جو مطالبہ کیا وہ عمران خان ہزار بار دہرا چکے ہیں۔
اسد عمر کا کہنا تھا کہ بند کمروں میں ہونے والی کوئی بات ایسی نہیں جو عمران خان جلسوں میں نہ کرتے ہوں، عمران خان نے عدم اعتماد سے پہلے آرمی چیف کی ایکسٹینشن کی بات ضرور کی تھی لیکن غیر معینہ مدت کے لیے ایکسٹینشن کی قانون میں کوئی گنجائش نہیں، عمران خان نے کبھی لندن اور واشنگٹن جا کر فوج کو بدنام کرنے کی کوشش نہیں کی، عمران خان نے کبھی چھپ کر بھارت جاکرفوج کے خلاف بات نہیں کی، فوج پر تنقید کرنا عمران خان کا آئینی حق ہے، عمران خان کی تنقید سے ہوسکتا ہے آپ اتفاق نہ کرتے ہوں، عمران خان نے کبھی ایسی بات نہیں کی کہ جس سے ادارہ کمزور ہو۔
ڈی جی آئی ایس آئی کے اس بیان پر کہ عمران خان کی نظر میں ملک کا سب سے بڑا مسئلہ اپوزيشن تھی ، اسد عمر نے ردعمل دیا کہ عمران خان کو اپوزيشن سے نہیں کرپشن سے مسئلہ ہے ، ان کی نظر میں کرپشن پر قابونہ پایا جائے تو ملک ترقی نہيں کرتے۔ رہنما تحریک انصاف کا کہنا تھا کہ سوچ بچارکی ضرورت ہے کہ ایسی صورتحال کیوں پیدا ہورہی ہے، سوچ بچار کریں گے تو محسوس ہوسکتا ہے کہ اداروں سے بھی کچھ غلطیاں ہوئی ہیں، کرپشن پر قابو نہ پایا جائے تو ملک ترقی نہیں کرتے، عمران خان کا یقین ہےکہ جب تک ایک قانون نہیں ہوگامعیشت ترقی نہیں کرسکتی۔