لاہور ( نیوزڈیسک ) قومی احتساب بیورو لاہور نے سابق وزیر اعلیٰ پنجاب عثمان بزدار کو غیر قانونی لائسنس اور آمدن سے زائد اثاثہ جات کیس میں گرفتار کرنے کا فیصلہ کر لیا۔ ہم نیوز نے نیب ذرائع کا حوالہ دیتے ہوئے رپورٹ کیا کہ نیب ہیڈ کوارٹر نے نیب لاہور کو سابق وزیر اعلیٰ پنجاب کی گرفتاری کے لیے 15 دن کا وقت دیا ہے، نیب ہیڈ کوارٹر کی طرف سے اس دوران عثمان بزدار کی گرفتاری سے متعلق مواد جلد مکمل کرنے کی ہدایت کی گئی ہے۔
رپورٹ میں ذرائع کے حوالے سے معلوم ہوا ہے کہ نیب انویسٹی گیشن ٹیم نے اپنی بریفنگ میں بتایا کہ عثمان بزدار کے خلاف ابھی ایسے شواہد نہیں ملے کہ انہیں گرفتار کیا جاسکے، جس پر نیب ہیڈ کوارٹر نے ہدایت کی ہے کہ 15 دن میں شواہد حاصل کرکے عثمان بزدار کی گرفتاری کو یقینی بنائی جائے۔

ذرائع کا حوالہ دیتے ہوئے مزید بتایا گیا ہے کہ نیب لاہور نے لاہور ڈویلپمنٹ اتھارٹی (ایل ڈی اے) سمیت دیگر سوسائٹیز کو مراسلے لکھ دیے ہیں جس میں عثمان بزدار کے نام پر موجود جائیداد کی تفصیلات طلب کی گئی ہیں، اس ضمن میں عثمان بزدار کے خلاف آمدن سے زائد اثاثوں کی بھی تحقیقات شروع ہیں اور ایل ڈی اے کو 17 اکتوبر کو مراسلہ لکھ کر تفصیلات مانگی گئیں۔

کہا گیا ہے کہ سابق وزیراعلیٰ پنجاب عثمان بزدار پر نجی ہوٹل کو غیر قانونی لائسنس دینے میں اپنا اثر و رسوخ استعمال کرنے کا بھی الزام ہے، اس حوالے سے عثمان بزدار کو تفتیش کے لیے نیب لاہور میں طلب کیا جا چکا ہے اور آئندہ چند روز میں عثمان بزدار کو دوبارہ بھی طلب کیا جائے گا۔ اس حوالے سے سابق وزیر اعلیٰ پنجاب کے وکیل اظہر صدیق کا کہنا ہے کہ عثمان بزدار کے خلاف سیاسی بنیادوں پر مقدمات بنائے جا رہے ہیں، ہماری طرف سے نیب کے ان غیر قانونی اقدامات کے خلاف جلد ہائی کورٹ سے رجوع کیا جائے گا۔