لاہور ( نیوز ڈیسک ) وزیراعلیٰ پنجاب چوہدری پرویز الہٰی نے کہا ہے کہ عمران خان کو قتل کی دھمکیاں دینے والے ملزم کے خلاف قانونی کارروائی کی جائے گی۔ تفصیلات کے مطابق سماجی رابطوں کی ویب سائٹ ٹوئٹر پر اپنے ایک بیان میں انہوں نے کہا کہ ن لیگی رہنما رائے قمر کو عمران خان کو دھمکیاں دینے پر گرفتار کرکے مقدمہ درج کرلیا گیا ہے، کسی کو بھی قانون ہاتھ میں لینے کی اجازت نہیں دی جائے گی اور عمران خان کو قتل کی دھمکی دینے والے ن لیگی رہنما رائے قمر کے خلاف قانونی کارروائی کی جائے گی۔


معلوم ہوا ہے کہ مسلم لیگ ن کے مقامی رہنما رائے قمر نے وزیراعظم کے معاون خصوصی عطا تارڑ اور سائرہ افضل تارڑ کی موجودگی میں عمران خان کو گولی مارنے کی دھمکی دی تھی اور پی ٹی آئی چیئرمین پر قاتلانہ حملہ کرنے والے کو وکیل کرکے دینے کا بھی اعلان کیا تھا، رائے قمر کا کہنا تھا کہ عمران خان کو گولی لگنے کا اسے قطعی کوئی افسوس نہیں ہے وہ واجب القتل ہے، لیگی قیادت نے حکم دیا تو میں خود اسے گولی مار کر قتل کروں گا۔



بتایا گیا ہے کہ پاکستان تحریک انصاف کے چیئرمین اور سابق وزیراعظم عمران خان کو قتل کی دھمکی دینے والا ن لیگی رہنما رائے قمر جو فرار ہونے کوششوں میں مصروف تھا تاہم اس کی کوشش کو پنجاب پولیس نے ناکام بنا دیا ہے اور ملزم کو حافظ آباد سے گرفتار کرلیا۔