لاہور(نیوز ڈیسک) سابق وزیراعظم نوازشریف کا کہنا ہے کہ جتھوں کی بات پہلے مانی ہے نہ اب مانیں گے۔پی ٹی آئی کے لانگ مارچ کا دوبارہ آغاز ہو گیا ہے۔گذشتہ روز لانگ مارچ کا آغاز وزیر آباد سے ہوا جس کی قیادت پی ٹی آئی کے نائب صدر شاہ محمود قریشی کر رہے ہیں۔ اسی حوالے سے مسلم لیگ ن کے قائد میاں نوازشریف نے لندن میں میڈیا سے گفتگو کرتے ہوئے تحریک انصاف کے لانگ مارچ پر تبصرہ کرتے ہوئے کہا کہ جتھوں کی بات پہلے مانی ہے نہ اب مانیں گے۔
نوازشریف نے یہ گفتگو وزیراعظم شہباز شریف نے ایک مشاورتی اجلاس کے بعد کی۔دوسری جانب ذرائع کا کہنا ہے کہ نوازشریف اور شہبازشریف کے درمیان ملاقات میں نئے آرمی چیف کی تقرری کیلئے سمری آئندہ ہفتے بھجوائے جانے کا فیصلہ کیا گیا ہے۔

وزیراعظم شہبازشریف آئندہ ہفتے اتحادی رہنماؤں سے مشاورت کریں گے، اہم تعیناتی مقررہ وقت پر وزیراعظم کریں گے۔

اسی طرح یہ فیصلہ کیا گیا کہ لانگ مارچ سے کسی دباؤ کا شکار نہیں ہوں گے، لانگ مارچ کے شرکاء سے قانون کے مطابق نمٹا جائے گا۔ ملاقات میں فیصلہ کیا گیا کہ نوازشریف کی وطن واپسی اسی سال میں ہوگی۔ مزید برآں اے آروائی نیوز کے مطابق وفاقی حکومت نے قائد ن لیگ اور سابق وزیر اعظم نواز شریف کو سفارتی پاسپورٹ جاری کردیا ہے، نوازشریف کو سفارتی پاسپورٹ 5 سال کیلئے جاری کیا گیا ہے، سفارتی پاسپورٹ نوازشریف کو بھجوا دیا گیا ہے۔
پاسپورٹ اینڈ امیگریشن کے آفس سے نوازشریف کو پاسپورٹ بھجوایا گیا ہے۔ سابق حکومت نے کرپشن کیسز میں سزا ہونے کی وجہ سے نوازشریف کا پاسپورٹ منسوخ کردیا تھا۔ یاد رہے موجودہ حکومت رواں سال نوازشریف کو عام پاسپورٹ پہلے ہی جاری کرچکی ہے۔واضح رہے کہ گزشتہ روز وزیراعظم شہبازشریف نے لندن میں اپنے بھائی قائد ن لیگ نوازشریف سے ملاقات بھی کی، جس میں موجودہ سیاسی و معاشی صورتحال سمیت مختلف امور پر تبادلہ خیال کیا گیا۔