اسلام آباد (نیوز ڈیسک) سپریم کورٹ کے 3 نئے ججز نے حلف اٹھا لیا۔چیف جسٹس پاکستان جسٹس عمر عطاء بندیال نے تینوں ججز سے حلف لیا۔ میڈیا رپورٹس کے مطابق سپریم کورٹ میں تین نئے ججز کی حلف برداری کی تقریب ہوئی،سپریم کورٹ میں تین نئے ججز نے عہدوں کا حلف اٹھا لیا۔ چیف جسٹس عمر عطاء بندیال نے تینوں ججز سے حلف لیا۔حلف اٹھانے والوں میں جسٹس اطہر من اللّٰہ،جسٹس حسن اظہر رضوی اور جسٹس شاہد وحید شامل ہیں۔
حلف برادری تقریب میں سپریم کورٹ کے ججز،بار کونسل کے نمائندے اور وکلاء کی بڑی تعداد نے شرکت کی۔تین نئے ججز کے حلف اٹھانے کے بعد سپریم کورٹ میں ججز کی کل تعداد 15 ہوگئی ہے،سپریم کورٹ میں تاحال مزید دو ججز کی نشستیں خالی ہیں۔جسٹس اطہر من اللّٰہ اس سے قبل اسلام آباد ہائیکورٹ کے چیف جسٹس رہ چکے ہیں۔

واضح رہے کہ دو روز قبل صدر مملکت عارف علوی نے اعلٰی عدلیہ میں ججز کی تعیناتی کی منظوری دی۔

صدر مملکت نے جسٹس اطہر من اللہ،جسٹس سید حسن اظہر رضوی اور جسٹس شاہد وحید کی بطور سپریم کورٹ جج تعینات کرنے کی منظوری دی۔صدر مملکت نے جسٹس عامر فاروق کو اسلام آباد ہائیکورٹ کا چیف جسٹس تعینات کرنے کی بھی منظوری دی۔ جبکہ جوڈیشل کمیشن نے 24 اکتوبر کو ساڑھے 3 گھنٹے طویل اجلاس کے بعد متفقہ طور پر جسٹس اطہر من اللہ کی سپریم کورٹ میں تعیناتی کی منظوری دی تھی۔
جوڈیشل کمیشن کے اجلاس میں لاہور ہائیکورٹ کے جسٹس شاہد وحید اور سندھ ہائیکورٹ جسٹس حسن رضوی کے ناموں پر 5 میں سے 4 ووٹوں کی اکثریت کے ساتھ منقسم منظوری دی گئی۔ دونوں اپنی اپنی متعلقہ عدالتوں کی سنیارٹی لسٹ میں چوتھے نمبر پر تھے،اجلاس میں سندھ ہائی کورٹ کے جسٹس محمد شفیع صدیقی کے نام کی تجویز کو یکسر مسترد کردیا گیا تھا۔