لاہور ( نیوز ڈیسک) پاکستان تحریک انصاف کے سربراہ عمران خان کی رہائش کا زمان پارک کی سیکیورٹی مزید بڑھانے کا فیصلہ کیا گیا ہے۔میڈیا رپورٹس کے مطابق زمان پارک میں عمران خان کی رہائش گاہ پر بلٹ پروف شیشے کی تنصیب شروع کردی گئی ہے۔زمان پارک میں عمران خان کے گھر میں بلٹ پروف شیشے لگانے کا کام شروع کر دیا گیا ہے۔
رپورٹ کے مطابق سابق وزیراعظم کے گھر کی 7 کھڑکیاں ہیں جن پر 35 بلٹ پروف شیشے لگوائے جائیں گے۔بلٹ پروف شیشے کی قیمت 90 لاکھ روپے ہے جو عمران خان اپنی جیب سے ادا کریں گے۔عمران خان سیاسی مصروفیات محدود کر چکے ہیں۔ذرائع کے مطابق عمران خان زیادہ وقت بچوں کے ساتھ گزار رہے ہیں اور پارٹی رہنماؤں کو ٹیلی فون کے ذریعے ہدایت دے رہے ہیں۔

اس سے قبل خیبرپختونخوا سے پولیس کمانڈوز زمان پارک پہنچے۔

خیبرپختونخوا کے پولیس کمانڈوز عمران خان کی سیکیورٹی کے فرائض سرانجام دیں گے۔کلوز سرکل میں خیبرپختونخوا پولیس کے کمانڈوز کو تعینات کیا گیا ہے۔ خیبرپختونخوا کے 15 پولیس کمانڈوز عمران خان کی رہائش گاہ لاہور پہنچے۔اسپیشل برانچ کی طرف سے عمران خان کے لیے جاری کیے گئے سکیورٹی الرٹ کے بعد زمان پارک لاہور میں عمران خان کی رہائشگاہ کے باہر سکیورٹی کے اقدامات بڑھا ئے گئے۔
عمران خان کے گھر کی دیوار کے ساتھ سکیورٹی کے پیش نظر ریت کے تھیلوں کی دیوار قائم کر دی گئی ہے جبکہ سیمنٹ کے بلاکس رکھ کر حفاظتی دیوار بھی بنا دی گئی۔زمان پارک کے داخلی و خارجی راستوں پر بھی ریت کے تھیلوں کی چیک پوسٹ بنا دی گئی ہے۔ اس کے علاوہ زمان پارک میں پولیس کی بھاری نفری تعینات کرکے سکیورٹی کے مزید کیمرے بھی نصب کر دئیے گئے۔
زمان پارک آنے جانے والوں کا ریکارڈ رکھنے کے لیے خصوصی ڈیسک بھی قائم کر دیا گیا۔ خیال رہے کہ عمران خان کو 6 نومبر کو شوکت خانم ہسپتال سے ڈسچارج کر دیا گیا تھا جس کے بعد انہیں انتہائی سخت سکیورٹی میں اپنی رہائش گاہ زمان پارک منتقل کیا گیا۔میڈیکل بورڈ نے چیئرمین پی ٹی آئی کو 11 بجے ڈسچارج کر دیا تھا، آرام کے دوران عمران خان کو دائیں ٹانگ پر وزن ڈالنے سے روکا گیا۔