ابوظہبی (نیوزڈیسک ) متحدہ عرب امارات کی چاند پر پہنچنے کی تیاریاں آخری مرحلے میں داخل ہوچکی ہیں، ملک کے پہلے چاند کے سفر کے لیے 10 روزہ سرکاری کاؤنٹ ڈاؤن آج سے شروع ہو رہا ہے کیوں کہ یو اے ای کے مون مشن کی 28 نومبر کو لانچنگ کی تصدیق کردی گئی۔ خلیجی میڈیا کے مطابق متحدہ عرب امارات نے چاند پر پہلے اماراتی مشن کے آغاز کے لیے الٹی گنتی شروع کر دی ہے کیوں کہ موسم کے لحاظ سے لفٹ آف کے لیے نئی تاریخ اور وقت کو حتمی شکل دے دی گئی ہے، لانچ کا وقت جاپان کے وقت کے مطابق شام 5 بج کر 46 منٹ پر مقرر کیا گیا ہے جو متحدہ عرب امارات کے وقت کے مطابق دوپہر 12 بج کر 46 منٹ ہے، جاپان میں قائم آئی اسپیس کمپنی یو اے ای کے راشد روور کو چاند کی سطح پر اتارے گا، یہ مشن اسپیس ایکس فالکن 9 راکٹ پر کیپ کیناورل فلوریڈا میں خلائی لانچ کمپلیکس 40 لانچ سائٹ سے روانہ ہوگا۔

بتایا گیا ہے کہ یہ متحدہ عرب امارات اور جاپان اور نجی صنعت کے لیے ایک تاریخی مشن ہے، جو چاند پر تجارتی کارگو مشن انجام دینے والی پہلی کمپنی بننے کے راستے پر ہے، اسپیس کے بانی تاکیشی ہاکاماڈا نے جمعرات کو ٹوکیو میں مشن کنٹرول میں لانچ کی نئی تاریخ کا اعلان کرتے ہوئے کہا کہ ہمارا پہلا مشن چاند کی صلاحیت کو ظاہر کرنے اور اسے ایک مضبوط اور متحرک معاشی نظام میں تبدیل کرنے کی بنیاد رکھے گا۔
معلوم ہوا ہے کہ راشد روور بہت سے سرکاری اور تجارتی پے لوڈز میں سے ایک ہے جو مشن 1 پر چاند پر جائے گا، 10 کلو گرام وزنی اس روور کو امارات کی ایک ٹیم نے دبئی کے محمد بن راشد خلائی مرکز میں بنایا تھا، چار پہیوں والا روور چاند کی سطح پر اپنی ارضیات اور چاند کی دھول کا مطالعہ کرنے کے لیے ایک قمری دن گزارے گا، جو کہ زمین کے 14 دنوں کے برابر ہے، امید کی جارہی ہے کہ یہ ہائی ریزولوشن کیمروں سے اپنے اردگرد کی ہزاروں تصاویر لے گا، اس مشن کے پیچھے محنت کرنے والے اماراتی انجینئر فلوریڈا میں ہیں جو لانچ کی حتمی تیاری کر رہے ہیں۔