اسلام آباد (نیوزڈیسک) پاکستان تحریک انصاف نے کہا ہے کہ پی ٹی آئی دونوں شخصیات کو تعینات پر مبارکباد پیش کرتی ہے، پی ٹی آئی ملک کی سلامتی اور اداروں کے استحکام کیلئے ہر قدم اٹھانے کو تیار ہے، فوج کی نئی قیادت سے توقع ہے کہ آئینی حقوق کی بحالی اورجمہوری استحکام میں کردار ادا کرے گی۔ اعلامیہ پی ٹی آئی کے مطابق فوج کے نئے سربراہ کی تقرری کے ضمن میں صدر کا اعلامیہ سامنے آچکا ہے، آرمی چیف کی تعیناتی جنرل عاصم منیر اور چیئرمین جوائنٹ چیفس آف اسٹاف کمیٹی مقرر ہونے پر جنرل ساحر شمشاد کیلئے نیک تمناؤں کا اظہار کرتے ہیں۔
پی ٹی آئی ملک کی سلامتی اور اداروں کے استحکام کیلئے ہر قدم اٹھانے کو تیار ہے، پی ٹی آئی دونوں شخصیات کو تعینات پر مبارکباد پیش کرتی ہے۔

گزشتہ 8 ماہ کے واقعات میں نے ملک میں واضح تفریق پیدا کی۔ 8 ماہ میں جو اقدامات اٹھائے گئے اس سے ملک اور اداروں کو شدید نقصان پہنچا، گزشتہ 8ماہ میں پاکستان میں انسانی حقوق کی بدترین خلاف ورزی دیکھنے میں آئی،صحافتی اداروں اور صحافیوں کو شدید دباؤ اور تشدد کا نشانہ بنایا گیا، ارشد شریف جیسے نامور صحافی کو شہید کردیا گیا، ملک کی بڑی جماعت اور لیڈر عمران خان کو دیوار سے لگانے کی کوشش کی گئی۔

جس سے ملک کو سیاسی عدم استحکام کا شکار کیا گیا جس سے معاشی بحران نے جنم لیا۔ فوج کی نئی قیادت سے ہماری توقع ہے کہ آئینی حقوق کی بحالی میں کردار ادا کرے گی اور جمہوریت کے استحکام کیلئے بھی اپنا کردار ادا کرے گی۔ توقع ہے عوام کو انتخابات کے ذریعے ملک کی نئی قیادت چننے کے حق کو تسلیم کیا جائے گا، توقع ہے کہ غیرجانبدرانہ مئوقف اپنا کر جماعتوں کے حقوق سلب نہیں کیے جائیں گے، ملک میں جاری بحران کا واحد حل نئے انتخابات ہیں، پاکستان کا درد رکھنے والے تمام اداروں اور شخصیات کو اپنا کردار ادا کرنا چاہیے۔ عوام فوج سے توقعات رکھتے ہیں کہ اندرونی معاملات پر غیرجانبدرانہ مئوقف اپنائے گی۔