اسلام آباد (نیوزڈیسک) وفاقی کابینہ نے ریکوڈک منصوبے کی منظوری دے دی ہے، منصوبے پر جلد کام شروع کرنے کی راہ ہموار ہوگئی، سود کی مجموعی 2 کروڑ 27 لاکھ ڈالر سے زائد رقم دی جائے گی، بلوچستان کے حصے کے شئیر کیلئے وزارت خزانہ رقم کا بندوبست کرے گی۔ دنیا نیوز کے مطابق وفاقی کابینہ نے ریکوڈک اہم منصوبے کی منظوری دے دی ہے،وفاقی کابینہ سے سرکولیشن کے ذریعے ہنگامی بنیادوں پر منظوری لی گئی۔
وفاقی کابینہ کی منظوری کے بعد منصوبے پر جلد کام شروع کرنے کی راہ ہموار ہوگئی ہے۔ سود کی مجموعی دو کروڑ ستائیس لاکھ ڈالر سے زائد رقم دی جائے گی، بلوچستان کے حصے کے شئیر کیلئے وزارت خزانہ قابل ادائیگی سود کی مد میں 85 لاکھ 19 ہزار ڈالر سے زائد رقم کا بندوبست کرے گی۔

کابینہ کی جانب سے چلی کمپنی انٹوفاگاسٹا کو واجبات ادا کرنے کیلئے اجازت دے دی گئی ہے۔

بتایا گیا ہے کہ جی ایچ پی ایل نے حکومتی گارنٹی کے ساتھ پہلے سے ہی65 ارب روپے جمع کررکھے ہیں۔ دوسری جانب نیوزایجنسی کے مطابق ریکوڈک سے متعلق قانون سازی، حکومت کا اتحادی سر دار اختر مینگل ناراض ، پندرہ دسمبر کو پارٹی کی کورکمیٹی کااجلاس طلب کرلیا ہے۔ ذرائع کے مطابق سردار اختر مینگل کا حکومتی اتحاد سے علیحدگی پر غورو،مشاورت بھی شروع کر دی اس ضمن میں سرداراختر مینگل نے 15 دسمبر کو پارٹی کی کور کمیٹی کااجلاس طلب کرلیا۔
ذرائع کے مطابق وفاقی حکومت کی جانب سے غیر ملکی سرمایہ کاری و تحفظ بل پر اعتماد میں نہ لینے پر سردار اختر مینگل ناراض ہیں، ذرائع کے مطابق وفاقی حکومت سے علیحدگی پر بھی پارٹی رہنماوں کے درمیان مشاورت ہوگی۔ سردار اختر مینگل نے گزشتہ روز ریکوڈک سے متعلق قانون سازی پر ساتھ دینے سے انکار اور تحفظات کا اظہار کیا تھا۔