مکہ مکرمہ (نیوزڈیسک) سعودی عرب کے کئی شہر طوفانی بارشوں کی زد میں، مکہ مکرمہ میں سیلابی ریلے گاڑیاں بہا لے گئے، سعودی عرب کے کئی علاقوں میں آئندہ چند روز کے دوران موسلادھار بارشوں اور ژالہ باری کے باعث سردی کی شدت میں واضح اضافے کا امکان ظاہر کیا گیا ہے۔ تفصیلات کے مطابق سعودی عرب کے کئی شہروں میں موسلادھار بارش نے موسم سرد کر دیا ہے۔
تبوک، مدینہ منورہ، الجوف ریجن، طائف، مکہ مکرمہ اور جدہ کے علاوہ دیگر سعودی عرب میں جمعہ کو موسلادھار بارش ہوئی، جبکہ کچھ علاقوں میں ژالہ باری کی اطلاعات بھی سامنے آئیں۔ بتایا گیا ہے کہ جمعہ کے روز مکہ مکرمہ میں طوفانی بارش کے باعث سیلابی صورتحال پیدا ہوئی، کچھ علاقوں میں سیلابی ریلے سڑکوں پر کھڑی گاڑیاں بہا لے گئے۔

جبکہ سعودی محکمہ موسمیات کی رپورٹ کے مطابق آئندہ چند روز کے دوران مملکت کے کئی علاقوں میں گرج چمک کے ساتھ بارش اور ژالہ باری کا امکان ہے، گرد آلود ہوائیں بھی چلیں گی جن کی وجہ سے حد نظر محدود ہونے کا امکان ہے۔

رپورٹ کے مطابق مکہ مکرمہ، باحہ، مدینہ منورہ، حائل، حدود شمالیہ، قصیم، ریاض اورعسیر میں مختلف مقامات پر بارش کا امکان ہے، شروع میں درمیانے درجے سے شروع ہونے والی یہ بارش بعد میں تیز ہوجائے گی جس کے باعث سیلاب کی صورتحال پیدا ہونے کا خدشہ ہے۔ رپورٹ کے مطابق ریاض، مدینہ منورہ، حدود شمالیہ، الجوف اور الشرقیہ ریجن بارش کی زد میں رہیں گے، تبوک ریجن کے بالائی مقامات پر ژالہ باری ہوگی، جس کی وجہ سے درجہ حرارت میں نمایاں کمی ہوجائے گا، اس دوران تبوک، الجوف، حدود شمالیہ، حائل اور مدینہ منورہ میں متعدد مقامات پر سخت سردی متوقع ہے۔
یہاں واضح رہے کہ سعودی عرب میں گزشتہ برس غیر معمولی سردی پڑی تھی، مملکت کے کئی علاقوں میں کئی ہفتوں تک سخت سردی کا موسم برقرار رہا تھا۔