راولپنڈی (نیوزڈیسک) چیف آف آرمی سٹاف جنرل عاصم منیر نے کہا ہے کہ پاکستان انتہائی نازک موڑ سے گزر رہا ہے، پاکستان کو اقتصادی اور دہشت گردی کے چیلنجز درپیش ہیں، تمام فریقین کے درمیان قومی اتفاق رائے کی ضرورت ہے۔ پاک فوج کے شعبہ تعلقات عامہ آئی ایس پی آر کے مطابق پاکستان نیول اکیڈمی کراچی میں مختلف کورسز کی پاسنگ آؤٹ پریڈ کا انعقاد ہوا، پاسنگ آؤٹ پریڈ میں آرمی چیف جنرل عاصم منیر نے بطور مہمان خصوصی شرکت کی۔
سربراہ پاک بحریہ ایڈمرل محمد امجد خان نیازہ نے آرمی چیف کا استقبال کیا۔ آرمی چیف نے تربیت مکمل کرنے والے ملکی اور دوست ممالک کے کیڈٹس کو مبارکباد پیش کی، آرمی چیف جنرل سید عاصم منیر نے پریڈ کے شرکاء میں انعامات بھی تقسیم کئے، تقریب میں پاکستان نیوی کے لیفٹیننٹ کاشف عبدالقیوم کو قائداعظم گولڈ میڈل سے نوازا گیا، مڈشپ مین نوفل ملک کو مجموعی طور پر بہترین کارکردگی پر اعزازی شمشیر سے نوازا گیا۔

آرمی چیف جنرل عاصم منیر نے معیاری تعلیم کی فراہمی پرپاکستان نیول اکیڈمی کے کردار کو سراہا۔ آرمی چیف جنرل عاصم منیر نے کہا کہ پاکستان انتہائی نازک موڑ سے گزر رہا ہے، پاکستان کو اقتصادی اور دہشتگردی کے چیلنجز درپیش ہیں۔ انہوں نے کہا کہ تمام فریقین کے درمیان قومی اتفاق رائے کی ضرورت ہے۔ آرمی چیف جنرل عاصم منیر نے کہا کہ میری ٹائم صورتحال مسلسل تبدیل ہو رہی ہے، مستقبل میں نیوی کا کردار انتہائی اہمیت کا حامل ہوگا، پاک نیوی کو پیشہ ورانہ مہارتوں اور جدید رحجانات سے ہم آہنگ کرنا ہوگا۔
آرمی چیف نے ملیر گیریژن کا بھی دورہ کیا اور یادگارشہداء پر پھول چڑھائے، آرمی چیف نے کراچی کور اور رینجرز کے افسران سے بھی خطاب کیا، آرمی چیف جنرل سید عاصم منیرنے جدید جنگی رجحانات پر توجہ مرکوز کرنے پر زور دیا۔