اسلام آباد(نیوزڈیسک) وزیراعظم شہباز شریف سال نو کی مبارکباددیتے ہوئے کہاہے کہ 2023 میں پاکستان کو معاشی و سیاسی استحکام اور سماجی بہتری کی منزل کی طرف لے کر جائیں گے سال نوکے موقع پرقوم کے نام اپنے پیغام میں وزیراعظم نے کہاکہ ان کی دعا ہے کہ اللہ تعالیٰ 2023 کے سال کو انسانیت کی فلاح و بہبود اور امن و خوش حالی کا باعث بنائے.
وزیراعظم نے کہاکہ 2023 میں پاکستان کو معاشی و سیاسی استحکام اور سماجی بہتری کی منزل کی طرف لے کر جائیں گے وزیراعظم نے کہاکہ 2022 پاکستان کے لئے تلخ و شیریں ثابت ہوا، سیلاب کی تباہ کاریوں نے عوام کے مسائل اور تکالیف میں اضافہ کیا.

وزیراعظم نے کہاکہ سال 2023 میں 3 کروڑ 30 لاکھ سیلاب متاثرین کی زندگیوں میں اجالے کرنے کی سرتوڑ کوشش کریں گے، دعا ہے کہ نیا سال دہشت گردی، مہنگائی سے نجات کا سال ہو، عوام کی جان اور معاش کا تحفظ ہو انہوں نے کہاکہ نئے سال میں دنیا کو موسمیاتی تبدیلیوں سمیت ہمہ جہت چیلنجوں کاسامنا ہے، نئے سال کو آنے والی نسلوں کے بہتر مستقبل کی پائیدار بنیاد بنانے کے لئے استعمال کرنا ہو گا.

وزیراعظم نے کہاکہ عہد کرتے ہیں کہ عوام کی زندگیوں کی تلخیاں کم کرنے اور حالات بہتر بنانے کے لئے دن رات کام کریں گے اور نئے سال کو اپنے نوجوانوں کے لئے مواقع کا سال بنائیں گے انہوں نے کہاکہ دعا ہے کہ نیا سال مقبوضہ جموں و کشمیر اور فلسطین کی آزادی کا سال ہو وزیراعظم نے کہاکہ نئے سال کے موقع پر شہدائے وطن کو خراج عقیدت پیش کرتے ہیں اور ان کے اہل خانہ سے ہمدردی کا اظہار کرتے ہیں، اللہ تعالیٰ شہدا کے درجات بلند فرمائے اور اہل خانہ کو صبر دے.