لاہور (نیوزڈیسک) وفاقی وزیر ریلوے ،ہوابازی خواجہ سعد رفیق نے کہا ہے کہ 3 ایئرپورٹس کی نجکاری نہیں بلکہ آپریشن کو آؤٹ سورس کیا جارہا ہے، ایئرپورٹس کے آپریشن کو 20 یا 25 سال کی مدت کیلئے آؤٹ سورس کرنا ہے، حکومت کو پریمیئم ملنے کے ساتھ بیرونی سرمایہ کاری آئے گی، یہ کام ساری دنیا نے کیا ہوا ہے۔ انہوں نے لاہور میں میڈیا سے گفتگو کرتے ہوئے کہا کہ جھوٹ اور پروپیگنڈا کا جواب دیتے ہماری بس ہوگئی لیکن جھوٹ بولنے والوں کی بس نہیں ہوئی، پہلے کہانی سنائی گئی کہ امریکا میں روزویلٹ ہوٹل کو بیچا جارہا ہے، میں پریس کانفرنس میں بتایا کہ ایسی کوئی تجویز نہیں ، 2020 میں روزویلٹ ہوٹل بند پڑا رہنے کے اخراجات25 ملین ڈالر کے ہیں، ان اخراجات کو نیچے لانے کیلئے 300 کمروں کو فنکشنل کرنے کیلئے کچھ پیسا درکار ہے، واضح بتایا گیا کہ یہ ہوٹل نہیں بیچا جائے گا، پھر تھوڑے دن پہلے ایک اور کہانی آئی جب حکومت نے 3ایئرپورٹ کے آپریشن کو آؤٹ سورس کرنے کا فیصلہ کیا تو کہانی بنائی گئی کہ ایئرپورٹس کی نجکاری ہونے لگی ہے، سی اے اے کے ذرائع سے جیونیوز نے خبر دی کہ ایئر پورٹس کی نجکاری ہورہی ہے، جبکہ ایسی کوئی بات نہیں ہے۔

انہوں نے کہا کہ 3ایئرپورٹس کے آپریشن کو 20یا25سال کی مدت کیلئے آؤٹ سورس کرنا ہے، جس کے عوض حکومت کو پریمیئم ملے گا،بیرونی سرمایہ کاری آئے گی، وہ اپنا کام کرکے چلے جائیں گے ہمارے ایئرپورٹس ہمارے پاس رہیں گے، ہماری سروسز انٹرنیشنل لیول کی ہوجائیں گی، یہ کام ساری دنیا نے کیا ہوا ہے، انڈیا اور سعودی عرب میں بھی ایئرپورٹس کو آؤٹ سورس کیا گیا ہے، یہ کوئی نجکاری نہیں ہے۔
انہوں نے کہا کہ ایم کیوایم کا وفاقی حکومت کے ساتھ کوئی مسئلہ نہیں ہے، بلدیاتی الیکشن پر پیپلزپارٹی اور ایم کیوایم کے تحفظات ہیں ہم دونوں کے درمیان سہولتکاری کی کوشش کررہے ہیں۔انہوں نے کہا کہ عمران خان کی جس طرح ملک کو عدم استحکام سے دوچار کرنے کی حرکتیں ہیں لگتا نہیں کہ الیکشن مقررہ وقت پر بھی ہوں گے۔ اب وفاقی حکومت نے سب سے بات چیت کرکے مارکیٹیں اور کاروبار رات 8بجے بند کرنے کا فیصلہ کیا ، دنیا میں تو دکانیں شام6بجے بند ہوجاتی ہیں، پاکستان کے پاس بجلی پیدا کرنے کیلئے تیل خریدنے کیلئے ڈالرز نہیں ہیں، تو بہترنہیں عادات بدل دیں، صبح جلد دکانیں اور کاروبار کھول لیا کریں۔