اسلام آباد (نیوزڈیسک) آئی جی اسلام آباد الیکشن کمیشن آف پاکستان کی جانب سے جاری کیے جانے والے پی ٹی آئی چئیرمین عمران خان ، پارٹی رہنما اسد عمراور فواد چوہدری کی گرفتاری کے قابلِ ضمانت وارنٹ کی تعمیل کریں گے۔جنگ اخبار کی رپورٹ کے مطابق وفاقی دارالحکومت کے پولیس چیف کو وارنٹس کے حوالے سے آگاہ کر دیا گیا۔
یہ وارنٹ عمران خان کی بنی گالا کی رہائشگاہ پر پہنچایا جائے گا اور اگر وہ وہاں نہ ملے تو لاہور پہنچایا جائے گا۔دیگر دو افراد کے وارنٹس بھی ان کے رہائشی پتے پر دئیے جائیں گے۔جبکہ پی ٹی آئی رہنماؤں نے الیکشن کمیشن کے گرفتاری کے حوالے سے اختیارات کو چیلنج کیا ہے۔ الیکشن کمیشن کی جانب سے چیئرمین پی ٹی آئی عمران خان، اسد عمر اور فواد چوہدری کے قابل ضمانت وارنٹ جاری کیے گئے، اس حوالے سے ترجمان تحریک انصاف فواد چوہدری نے کہا ہے کہ الیکشن کمیشن کا وارنٹ جاری کرنے کا فیصلہ ہائیکورٹ کے فیصلے کی توہین ہے، کیس کی تاریخ 17 جنوری تھی جس کو رولز کے خلاف آج مقرر کرکے فیصلہ دیا گیا، الیکشن کمیشن کیخلاف توہین عدالت میں جا رہے ہیں، انہیں توہین عدالت میں سزا ہوگی۔
الیکشن کمیشن کے اسی فیصلے پر تبصرہ کرتے ہوئے تحریک انصاف کے جنرل سیکرٹری اسد عمر کا کہنا ہے کہ الیکشن کمیشن نے عمران خان، میرے اور فواد چوہدری کے وارنٹ گرفتاری جاری کر دیئے، یہ الیکشن کمیشن انتخابات کروانے کا کام کرنے کے بجائے ان کاموں میں لگا ہوا ہے، حالاں کہ خود یہ اسلام آباد بلدیاتی الیکشن نہ کروا کر توہینِ عدالت کے مرتکب ہوئے ہیں۔
یاد رہے کہ الیکشن کمیشن میں عمران خان،اسد عمر اور فواد چوہدری کے خلاف توہین الیکشن کمیشن کیس کی سماعت ہوئی، الیکشن کمیشن کے ممبر نثار درانی کی سربراہی میں 4 رکنی بینچ نے سماعت کی، الیکشن کمیشن نے حاضری سے استثنٰی کی درخواست پر محفوظ فیصلہ سنایا، الیکشن کمیشن نے عمران خان،اسد عمر اور فواد چوہدری کی حاضری سے استثنیٰ کی درخواست مسترد کر دی، الیکشن کمیشن نے عمران خان،اسد عمر اور فواد چوہدری کے قابل ضمانت وارنٹ گرفتاری جاری کر دئیے اور ان کی حاضری سے استثنی کی درخواست خارج کر دی، الیکشن کمیشن میں کیس کی آئندہ سماعت 17 جنوری ہو گی۔