لاہور (نیوزڈیسک) پاکستان تحریک انصاف کے ترجمان فواد چوہدری نے کہا ہے کہ ہمارے پاس آئین ہی متفقہ دستاویز ہے، اگر آئین کو بھی روند دیا گیا تو پاکستان کی ریاست شدید خطرات کا شکار ہو جائے گی، بہت ہو گیا آئین کی بالادستی کیلئے ہماری تحریک بالکل تیار ہے، جیل بھرو سے اس تحریک کا آغاز ہوگا اور آئین کی بحالی تک تحریک جاری رہے گی۔
تفصیلات کے مطابق سماجی رابطوں کی ویب سائٹ ٹوئٹر پر اپنے ایک بیان میں انہوں نے کہا کہ الیکشن کمیشن کو انتخابات کیلئے آج اجلاس منعقد کرنا چاہئے تھا، آئین اور عدالتی احکامات کو مذاق نہ بنائیں، عدالت کے واضح احکامات کے بعد بھی عام تاثر ہے کہ چونکہ الیکشن کمیشن منشیوں پر مشتمل ہے اسلام آباد کی طرح صوبائی الیکشن بھی نہیں کرائے گا، آئین کے ساتھ یہ کھلواڑ ملک کو مہنگا پڑے گا۔



سابق وفاقی وزیر نے کہا کہ پنجاب میں بیوروکریٹس جو 25 مئی کے واقعات میں شامل تھے اور جن کو دوبارہ نقوی حکومت نے دھاندلی کی نیت سے پنجاب میں تعینات کیا ان سے کہتا ہوں خود پنجاب سے علیحدہ ہو جائیں،ریاست کے ساتھ اپنے حلف کا پاس کریں ،کسی سیاسی پارٹی کا وفادار اہل کار ثابت کرنا سول سرونٹس کیلئے نامناسب ہے۔



علاوہ ازیں تحریک انصاف کے رہنما فواد چوہدری کا کہنا ہے کہ پاکستان میں پی ڈی ایم حکومت کو دوام دینے کیلئے معاشی ایمرجنسی لگانے کی گفتگو ہو رہی ہے، اگر ایسا ہوا تو اس کے شدید سکیورٹی اثرات مرتب ہوں گے، ایسی احمقانہ پالیسیوں پر ضد کر کے ملک کی سالمیت کو داؤ پر لگایا جا رہا ہے، ملک میں انتخابات کروا کر حکومت منتخب لوگوں کو منتقل کی جائے،اور ملک کے مستقبل سے کھیلنا بند ہونا چاہیے۔