کراچی (نیوزڈیسک) ڈالر ملکی تاریخ کی بلند ترین سطح پر پہنچ گیا،انٹر بینک میں ڈالر 14 روپے 89 پیسے مہنگا ہو گیا۔ میڈیا رپورٹس کے مطابق انٹر بینک میں ڈالر کی قیمت میں اضافے کا سلسلہ جاری ہے،آج بھی انٹر بینک اور اوپن مارکیٹ میں ڈالر مہنگا ہوا ہے،انٹر بینک میں ڈالر 14 روپے 89 پیسے مہنگا ہونے کے بعد 281 روپے پر فروخت ہو رہا ہے۔
فاریکس ڈیلرز کے مطابق بینک درآمد کنندگان کو ڈالر 283 روپے میں فروخت کر رہے ہیں،جبکہ اوپن مارکیٹ میں ڈالر 286 روپے میں فروخت ہو رہا ہے۔ یاد رہے کہ گزشتہ روز ڈالر کی قیمت میں 7 روپے کا اضافہ ہوا تھا۔ اسٹیٹ بینک آف پاکستان کی جانب سے جاری اعداد و شمار کے مطابق انٹربینک میں کاروبار کے اختتام پر ایک ڈالر 266.11 روپے کا ہو گیا تھا، جبکہ اس سے پہلے بھی انٹر بینک اور اوپن مارکیٹ میں روپے کے مقابلے ڈالر مہنگا ہوا تھا،منگل کے روز 1.58روپے کے اضافے سے ڈالر261.50 روپے کا ہو گیا تھا جبکہ فاریکس ایسوسی ایشن آف پاکستان کی رپورٹ کے مطابق انٹر بینک میں ڈالر1.90 روپے اور اوپن مارکیٹ میں ڈالر1.50روپے مہنگا ہوا تھا جس کے بعد انٹر بینک میں ڈالر کی قدر260 روپے سے بڑھ کر261.90 روپے ہو گئی تھی۔

اسی طرح اوپن مارکیٹ میں ڈالر کی قدر 265 روپے سے بڑھ کر 266.50 روپے پر پہنچ گئی تھی ۔ فاریکس رپورٹ کے مطابق یورو کی قدر میں 2.70 روپے کا اضافہ ریکارڈ کیا گیا جس سے یورو کی قیمت فروخت 278.30 روپے سے بڑھ کر281 روپے ہو گئی تھی۔ 5 روپے کے نمایاں اضافے سے برطانوی پونڈ کی قیمت فروخت 315 روپے سے بڑھ کر320 روپے پر پہنچ گئی تھی۔ جبکہ اسٹاک ایکسچینج میں بھی کاروبار میں منفی رحجان نظر آیا۔پاکستان اسٹاک ایکسچینج کا 100 انڈیکس 37 پوائنٹس کم ہونے کے بعد 40 ہزار 747 پر آ گیا تھا،100 انڈیکس 40 ہزار 784 پوائنٹس پر بند ہوا تھا۔ یہ بھی خیال رہے کہ گزشتہ دنوں پاکستان کو چین سے 70 کروڑ ڈالر موصول ہو ئے تھے،رقم چائنا ڈویلپمنٹ بینک کی طرف سے رول اوور معاہدے کے تحت موصول ہوئی۔