لندن (نیوزڈیسک) لندن میں نامعلوم افراد کی جانب سے نواز شریف کے نام پر 3 گاڑیاں رجسٹرڈ کروائے جانے کا انکشاف ہوگیا۔ میڈیا رپورٹس کے مطابق سابق وزیراعظم نواز شریف کے نام پر نامعلوم افراد نے 3 گاڑیاں رجسٹرڈ کروا لی ہیں، جس پر لندن پولیس نے معاملے کی تحقیقات شروع کر دی ہیں۔ نواز شریف کے لندن آفس کے ترجمان خرم بٹ نے پولیس کو خدشات سے آگاہ کرتے ہوئے بتایا کہ گاڑیاں نواز شریف کے نام پر رجسٹر کروانے کا مقصد جرائم کرکے ان کا تعلق نواز شریف سے جوڑنا ہوسکتا ہے، جس کے لیے نواز شریف کے نام پر رجسٹر گاڑیوں کو دہشت گردی، دھوکا دہی اور مجرمانہ کارروائیوں کیلئے استعمال کیا جاسکتا ہے۔
انہوں نے کہا کہ یہ معاملہ اس وقت سامنے آیا جب نواز شریف کے نام رجسٹرڈ گاڑی کی تفصیل ڈی وی ایل اے نے ایون فیلڈ ارسال کی، مارچ 2023ء میں نواز شریف آفس نے ڈی وی ایل اے کو فراڈ سے متعلق آگاہ کردیا تھا لیکن اس کے باوجود اپریل 2023ء میں ایک اور گاڑی نواز شریف کے نام پر رجسٹر کی گئی اور سابق وزیراعظم کے نام پر رجسٹرڈ تیسری گاڑی کا اس وقت پتا چلا جب ٹریفک قواعد کی خلاف ورزی کا جرمانہ موصول ہوا۔
قائد مسلم لیگ ن کے لندن آفس کے ترجمان خرم بٹ نے کہا کہ چند شرپسند عناصر نواز شریف کا نام اپنے مجرمانہ مقاصد کیلئے استعمال کرنے کی کوشش کر رہے ہیں، دوسروں کے نام پر گاڑی رجسٹر کروانے والے جلد پکڑے جائیں گے، پولیس کو بتایا ہے کہ پی ٹی آئی کے سپوٹرز اس فراڈ میں ملوث ہوسکتے ہیں۔