ریاض (نیوزڈیسک) پاکستان اور سعودی عرب کے درمیان اہم معاہدہ طے پاگیا جس کے تحت دونوں ممالک کمیونیکیشن اور انفارمیشن ٹیکنالوجی کے شعبے میں ایک دوسرے کے ساتھ تعاون کریں گے، اس معاہدے کی بدولت پاکستان اور سعودی عرب کے درمیان ڈیجیٹل اکانومی، ڈیجیٹل انفراسٹرکچر مین جدت لانے، ڈیجیٹل انوویشن کی حوصلہ افزائی اور ڈیجیٹل تبدیلی میں تیزی لانے کیلئے باہمی تعاون کو فروغ ملے گا۔
سعودی عرب کے سرکاری خبررساں ادارے ایس پی اے کے مطابق اس حوالے سے مفاہمتی یادداشت پر سعودی وزیر کمیونیکیشن اینڈ انفارمیشن ٹیکنالوجی انجینیئر عبداللہ السواحہ اور پاکستان کے نگران وفاقی وزیر ڈاکٹرعمر سیف نے دستخط کیے، اس معاہدے کے تحت نئے ٹیکنالوجی سینٹر قائم کیے جائیں گے، دونوں ممالک ڈیجیٹل اکانومی، انفارمیشن ٹیکنالوجی کی کمپنیز کے قیام، مشترکہ ٹریننگ پروگرام کی تیاری اور انفارمیشن ٹیکنالوجی نیز کمیونیکیشن میں ماہر افراد تک رسائی کے لیے مشترکہ کوششوں بروئے کار لاتے ہوئے باہمی تعاون کو بڑھائیں گے۔



بتایا گیا ہے کہ معاہدے میں پاکستان اور سعودی عرب میں یونیورسٹیوں کے کیمپس کھولنے پر بھی اتفاق ہوا، جہاں جدید ٹیکنالوجی کے مراِکز اور سینٹر آف ایکسی لینس قائم کیے جائیں گے، دونوں ممالک چھوٹے اور درمیانے درجے کی کمپنیوں اور نئی ابھرتی ہوئی کمپنیز کے نظام میں ایک دوسرے کے ساتھ تعاون بڑھائیں گے، پاک سعودی الیکٹرانک صنعت، پالیسیوں، ٹیکنالوجیز، سسٹمز اور قانون سازی سے متعلق معلومات کیا جائے گا، ڈیجیٹلائزیشن اور الیکٹرانک مینوفیکچرنگ کے شعبے میں بھی ایک دوسرے کے تجربے سے فائدہ اٹھایا جائے گا۔
معلوم ہوا ہے کہ معاہدے کے بعد سعودی عرب اور پاکستان ای گورننس، سمارٹ انفراسٹرکچر، ای ہیلتھ اور ای ایجوکیشن کے شعبوں میں تعاون بڑھائیں گے، ڈیجٹل ریسرچ، انوویشن اور ابھرتی ہوئی ٹیکنالوجی کے استعمال میں شراکت داری مضبوط کریں گے، دونوں ممالک کے مابین مصنوعی ذہانت، انٹرنیٹ آف تھنگز، روبوٹکس، کلاؤڈ کمپیوٹنگ، گیمز اور بلاک چین باہمی تعاون کے اہم شعبے ہوں گے۔
یہ بھی پتا چلا ہے کہ پاکستان اور سعودی عرب میں کاروباری افراد اور اداروں کو تکنیکی سرمایہ کاری اور وینچر کیپٹل کا دائرہ وسیع کرنے کے قابل بنانے کے لیے مشترکہ اختراعی میکنزم اور طریقہ کار تیار کرنے میں مدد فراہم کرنے کی کوشش کی جائے گی، فریقین رابطے بڑھا کر ڈیجیٹل انفراسٹرکچر کو ترقی دیں گے، دونوں ممالک بین الاقوامی ایونٹس میں شرکت کی حوصلہ افزائی کے ساتھ ساتھ کلاؤڈ کمپیوٹنگ کیلئے انفراسٹرکچر اور ڈیٹا سینٹرز قائم کرنے میں تعاون کریں گے۔