لندن(نیوزڈیسک) امریکا نے اسرائیل پر ایرانی حملے کے خدشے کے پیش نظر ایٹمی آبدوزسمیت جنگی طیاروں اور بحریہ کے جنگی جہازوں کے ایک اسٹرائیک گروپ کو مشرق وسطیٰ میں طیاروں کی تعیناتی تیز کرنے کا حکم دیا ہے. برطانوی جریدے”‘ گارجین“کے مطابق امریکی وزیر دفاع لائیڈ آسٹن نے اپنے اسرائیلی ہم منصب یوو گیلنٹ سے بات کرنے کے بعد ابراہم لنکن اسٹرائیک گروپ کو خطے میں اپنی تعیناتی کو تیز کرنے کا حکم دیا اور اسی کے ساتھ انہوں نے گائیڈڈ میزائل آبدوز کی تعیناتی کا بھی اعلان کیا.

عالمی جنگی تجزیہ کاروں کا کہنا ہے کہ پینٹاگون کی جانب سے آبدوز کی تعیناتی کا عوامی طور پر اعلان کرنا غیر معمولی ہے یاد رہے کہ امریکی فوج نے پہلے ہی کہا تھا کہ وہ مشرق وسطیٰ میں اضافی لڑاکا طیارے اور جنگی جہاز تعینات کریں گے کیونکہ واشنگٹن اسرائیل کے دفاع کو تقویت دینا چاہتا ہے، ایران میں اسماعیل ہنیہ کے قتل کے بعد ایران نے اسرائیل سے قتل کا بدلہ لینے کا عزم ظاہر کیا تھا ایران نے اس قتل کا الزام اسرائیل پر عائد کیا ہے تاہم اسرائیل نے اس کی ذمہ داری قبول نہیں کی.
اسماعیل ہنیہ کی شہادت اور اسرائیل کی طرف سے بیروت پر حملے میں ایران کے حمایت یافتہ لبنانی گروپ حزب اللہ کے سینئر فوجی کمانڈر فواد شکر کے قتل نے ان خدشات کو ہوا دی ہے کہ غزہ کا تنازع مشرق وسطیٰ کی وسیع جنگ میں تبدیل ہو سکتا ہے یہ اس وقت سامنے آیا جب حماس جنگ بندی کے مذاکرات دوبارہ شروع کرنے کے خلاف پیچھے ہٹتی دکھائی دے رہی ہے جمعہ کے روز امریکا، مصر اور قطر کے راہنماﺅں نے اسرائیل اور حماس پر زور دیا کہ وہ 15 اگست تک جنگ بندی اور یرغمالیوں کی رہائی کے معاہدے کو حتمی شکل دینے کے لیے مذاکرات دوبارہ شروع کریں.
اسرائیل نے کہہ چکا ہے کہ وہ اس اجلاس میں شرکت کے لیے مذاکرات کار بھیجے گا جبکہ حماس نے شروع میں کہا تھا کہ وہ اس پیشکش کا مطالعہ کر رہی ہے لیکن اب اشارہ دیا ہے کہ وہ مذاکرات کے نئے دور سے باہر ہو سکتی ہے امریکی صدر جو بائیڈن نے 31 مئی کو ایک خطاب میں تین مرحلوں پر مشتمل جنگ بندی کی تجویز پیش کی تھی اس کے بعد سے واشنگٹن اور علاقائی ثالثوں نے غزہ میں یرغمالیوں کے لیے جنگ بندی کے معاہدے کو ترتیب دینے کی کوشش کی ہے لیکن انہیں بار بار رکاوٹوں کا سامنا کرنا پڑا ہے.