ریاض (نیوزڈیسک) وزیراعظم شہباز شریف اور فرانس کے صدر کے درمیان ملاقات میں دونوں ممالک کے درمیان بزنس ٹو بزنس روابط بڑھانے پر اتفاق ہوگیا۔ تفصیلات کے مطابق سعودی عرب کے دارالخلافہ ریاض میں ’ون واٹر‘ سربراہی اجلاس کے موقع پر وزیراعظم شہباز شریف کی فرانس کے صدر ایمانوئل میکرون سے ملاقات ہوئی، وزیر اعظم نے ریاض میں ون واٹر سمٹ کی کامیاب مشترکہ میزبانی پر فرانسیسی صدر کو مبارکباد دی، انہوں نے موسمیاتی تبدیلی و ترقیاتی امور پر فرانس کے قائدانہ کردار کی بھی تعریف کی۔
بتایا گیا ہے کہ ملاقات میں دونوں رہنماؤں نے پاکستان فرانس تعلقات کی مثبت سمت پر اطمینان کا اظہار کیا، ملاقات میں مختلف شعبوں سیاسی، اقتصادی، تجارتی اور سرمایہ کاری کے ساتھ اقوام متحدہ سمیت کثیرالجہتی فورمز پر تعاون پر گفتگو ہوئی، وزیراعظم نے 2022ء کے تباہ کن سیلاب کے تناظر میں فرانس کی طرف سے پاکستان کی بھرپور حمایت کو سراہا، ملاقات میں دونوں رہنماؤں نے زراعت اور لائیو اسٹاک کے شعبوں میں تعاون بڑھانے پر اتفاق کیا، آئی ٹی، پیشہ ورانہ مہارتوں میں ترقی اور پینے کے پانی کے شعبوں میں بزنس ٹو بزنس روابط بڑھانے پر بھی اتفاق پایا گیا۔

معلوم ہوا ہے کہ اس ملاقات کے دوران دونوں رہنماؤں کی جانب سے باہمی دلچسپی کے علاقائی اور عالمی مسائل سے متعلق روابط کے مزید فروغ کی مشترکہ خواہش کا اعادہ بھی کیا گیا جب کہ وزیراعظم شہباز شریف نے دونوں ملکوں میں مفید اقتصادی اور تجارتی تعلقات کو مزید مضبوط بنانے کی ضرورت پر زور دیا، انہوں نے فرانس کو پاکستان میں سرمایہ کاری بالخصوص موسمیاتی موافقت اور قابل تجدید توانائی سے استفادہ کرنے کی دعوت دی۔