واشنگٹن(نیوزڈیسک)امریکا کے نومنتخب صدر ڈونلڈ ٹرمپ نے واضح کیا ہے کہ وہ 20 جنوری کو عہدہ سنبھالنے کے بعد وسیع پیمانے پر تبدیلیاں کریں گے جن میں پیدائشی امریکی شہریت کا خاتمہ بھی شامل ہے تاہم اس کے لیے امریکی شہریت کے قانون اور آئین میں تبدیلی کی ضرورت ہے کیونکہ پیدائشی امریکی شہریت کا معاملہ امریکی آئین میں دیئے گئے بنیادی حقوق میں شامل ہے.
امریکی نشریاتی ادارے کے مطابق نو منتخب امریکی صدر نے ”این بی سی“ کے پروگرام میں گفتگو کرتے کہا کہ انہیں امریکا میں موجود تمام غیر قانونی تارکین وطن کو ملک بدر کرنے اور پیدائشی شہریت ختم کرنے سمیت انتخابی مہم کے کیے گئے تمام وعدوں کو فوری پورا کرنا ہوگا جب ان سے پوچھا گیا کہ کیا وہ اپنی مدت کے دوران اگلے 4 سالوں میں غیر قانونی طور پر مقیم افراد کو ملک بدر کرنے کا ارادہ رکھتے ہیں تو انہوں نے جواب دیا ’ایسا کرنا پڑے گا.
ٹرمپ نے اس بات پر زور دیا کہ ہم امریکی آئین میں درج پیدائشی شہریت کو ختم کر دیں گے اگر ہم انتظامی کارروائی کے ذریعے ایسا کر سکتے ہیں تو اس پر جلد عمل کریں گے خیال رہے کہ ڈونلڈ ٹرمپ انتخابی مہم کے دوران بھی متعدد بار پیدائشی شہریت کا حق دینے پر تنقید کر چکے ہیں ان کا ماننا ہے کہ امریکی سرزمین میں پیدا ہونے والے کسی بھی بچے کو خود بخود امریکی شہریت کا اہل قرار دینے سے متعلق ضوابط تبدیل ہونا چاہیے.
تاہم امریکی قانون دانوں کا کہنا ہے کہ کانگریس کے اراکین میں بہت سارے ایسے ممبران ہیں جو پیدائشی شہریت کے اس قانون کے تحت امریکی شہری بنے اور اپنے پچھلے دور صدارت میں بھی ڈونلڈ ٹرمپ اس قانون کا خاتمہ چاہتے تھے مگر کانگریس نے انہیں ایسا کرنے سے روکا کیونکہ یہ امریکی آئین کی روح کے خلاف ہے شخصی آزادیاں اور شہری حقوق کا تحفظ امریکی آئین کی اساس ہے ان کا کہنا ہے کہ اگر ایگزیکٹیو آڈرکے ذریعے ایسا کوئی حکم مسلط کرنے کی کوشش کی گئی تو امریکی عدالتیں اس کا راستہ روکیں گی.
انتخابی مہم کے دوران ڈونلڈ ٹرمپ نے انتخابی ریلی کے دوران عوام کو مخاطب کرتے ہوئے کہا تھا کہ امریکا واحد ملک ہے جہاں کوئی شخص آتا ہے اور اس کا یہاں ایک بچہ پیدا ہوتا ہے اور وہ بچہ امریکی شہری بن جاتا ہے آئین کے مطابق امریکی سرزمین پر پیدا ہونے والا وہ بچہ بھی امریکی شہری ہے جس کے والدین امریکی شہری نہ ہوں اور وہ بھی جس کے والدین غیر قانونی طور پر امریکا میں مقیم ہوں انٹریو کے دوران ٹرمپ نے یہ بھی کہا کہ وہ اپنی پہلی مدت میں منظور کردہ ٹیکس کٹوتیوں میں توسیع کے لیے کام کریں گے.
انہوں نے کہا کہ وہ اسقاط حمل کی گولیوں پر پابندی لگانے کی کوشش نہیں کریں گے تاہم وہ فوری طور پر لاکھوں غیر قانونی تارکین وطن کو ملک بدر کرنے کا ارادہ رکھتے ہیں ڈونلڈ ٹرمپ نے 6 جنوری 2021 کو امریکی کانگریس کیپیٹل ہل پر حملے کے کیس میں گرفتار افراد کو صدارت کے پہلے ہی دن معافی دینے کا وعدہ کرتے ہوئے کہا کہ بہت سے لوگوں نے جیل میں حد سے زیادہ سخت سلوک برداشت کیا ہے.