واشنگٹن(نیوزڈیسک)امریکا کے نائب قومی سلامتی مشیر جان فائنر نے کہاہے کہ پاکستان ایسے میزائل تیار کر رہا ہے جو امریکا کے اہداف کو بھی نشانہ بنا سکتے ہیں۔غیرملکی خبررساں ادارے کے مطابق اپنے بیان میں انکا کہنا تھا کہ پاکستان ایسے میزائل تیار کر رہا ہے جو جنوبی ایشیا سے باہر امریکا کے اہداف کو بھی نشانہ بنا سکتے ہیں۔
انہوں نے کہا کہ پاکستان کی میزائل تیاریاں اس کے ارادوں کے بارے میں سوالات اٹھاتی ہیں۔ جان فائنر کا کہنا تھا کہ پاکستانی اقدامات کو ایک ابھرتی ہوئی دھمکی کے علاوہ کسی اور چیز کے طور پر دیکھنا مشکل ہے۔اس سے قبل امریکا نے طویل فاصلے تک مار کرنے والے بیلسٹک میزائلوں کی تیاری کے حوالے سے پاکستان کے چار اداروں پر پابندی لگانے کیلیے ان کی نشاندہی کی تھی۔

امریکی محکمہ خارجہ کے ترجمان میتھیو ملر کے مطابق ان اداروں پر الزام ہے کہ انہوں نے پاکستان کے بیلسٹک میزائل پروگرام کو آگے بڑھانے میں مدد دی۔اس میں خصوصی وہیکل چیسز کی تیاری بھی شامل ہے جو بیلسٹک میزائلوں کی لانچنگ کے لیے استعمال کیے جاتے ہیں۔ترجمان نے کہا تھا کہ تباہی پھیلانے والے ہتھیاروں یا ان کی ترسیل کے ذرائع پر کارروائی کی جائے گی۔امریکی محکمہ خارجہ کے بیان پر ردِ عمل دیتے ہوئے پاکستان نے امریکا کی جانب سے پابندی کے اقدام کو متعصبانہ قرار دیا تھا۔