واشنگٹن (نیوزڈیسک) حالیہ الیکشن میں منتخب امریکی صدر ڈونلڈ ٹرمپ کے مشیر رچرڈ گرینل نے سابق وزیراعظم عمران خان کی رہائی کا مطالبہ کرتے ہوئے کھل کر اس کی وجہ بھی بتادی۔ نامزد امریکی مشیر برائے سپیشل مشن رچرڈ گرینل نے امریکی ٹی وی کو انٹرویو دیتے ہوئے کہا کہ عمران خان پر بھی صدرٹرمپ کی طرح کرپشن کے بہت سے جھوٹے الزامات ہیں، بانی پی ٹی آئی کو بھی پاکستان کی حکمران جماعت نے جیل میں ڈالا، وہ وزیراعظم کیلئے انتخاب لڑنا چاہتے ہیں تو عوام کو فیصلہ کرنے دینا چاہیئے، اسی لیے میں چاہتا ہوں عمران خان کو جیل سے رہا کیا جائے۔
ڈونلڈ ٹرمپ کے مشیر نے الزام عائد کیا کہ پاکستان میں بہت سارے معاملات کو بائیڈن انتظامیہ نے گزشتہ چار سال نظر انداز کیا اور کوئی پیشرفت نہیں کی، بائیڈن انتظامیہ بھی اب جاتے جاتے ایسے دکھانا چاہ رہی ہے جیسے انہیں بہت پرواہ ہے اور پاکستان میں معاملات پر پیشرفت چاہتی ہے، اسی لیے عجیب و غریب بیان سے میتھیو ملر بھی یہی کہنا چاہ رہے تھے کہ عمران خان کو رہا کیا جائے لیکن میں دبے الفاظ میں نہیں کھل کر کہہ رہا ہوں کہ پاکستان کے سابق وزیراعظم کو رہا کیا جائے۔

رچرڈ گرینل کا کہنا ہے کہ ٹرمپ انتظامیہ کے دور میں پاکستان سے تعلقات بہت اچھے تھے، عمران خان کے بطور وزیراعظم امریکی صدر ٹرمپ سے اچھے تعلقات تھے کیوں کہ پاکستان کے سابق وزیراعظم سسٹم سے باہر کے آدمی تھے، وہ سابق کرکٹر ہیں روایتی سیاستدان نہیں اس لئے صاف بات کرتے ہیں، عقل وفہم رکھنے والے غیر روایتی سیاستدان اور کاروباری لوگ ملک کو بہتر طریقے سے چلا سکتے ہیں۔