سیئول (نیوزڈیسک) جنوبی کوریا کے موآن انٹرنیشنل ایئرپورٹ پر مسافر طیارہ رن وے سے اُتر کر حفاظتی دیوار سے ٹکراگیا جس کے نتیجے میں 85 افراد ہلاک ہو گئے۔ عالمی میڈیا کے مطابق جنوبی کوریا کے جنوب مغربی شہر موآن میں مسافر طیارے کو لینڈنگ کے دوران پیش آنے والے حادثے میں 85 افراد ہلاک ہوئے، اس حوالے سے جنوبی کوریا کی وزارتِ ٹرانسپورٹ کا بیان میں کہنا ہے کہ حادثہ اُس وقت پیش آیا جب جیجو ایئر کی پرواز سی 22167 تھائی لینڈ کے دارالحکومت بنکاک سے 175 مسافروں اور عملے کے 6 ارکان کو لے کر مقامی وقت کے مطابق صبح 9 بجے ملک کے جنوب میں واقع ایئرپورٹ پر لینڈ کر رہی تھی۔
فائر بریگیڈ کے اہلکار نے بتایا کہ 33 نعشیں نکال لی گئی ہیں تاہم یہ تعداد حتمی نہیں، حکام اور وزارت ٹرانسپورٹ نے اموات کی رپورٹس کی تصدیق نہیں کی، تاہم جنوبی کوریا کی نیوز ایجنسی یونہاپ نے رپورٹ کیا کہ حادثے میں 3 افراد کو بچا لیا گیا، ملک کے جنوب مغربی شہر موآن کے ایئرپورٹ پر آگ بجھانے کے لیے موجود اہلکار کا کہنا تھا کہ 2 افراد زندہ پائے گئے جب کہ امدادی کارروائیاں جاری ہیں، حکام طیارے کے پچھلے حصّے میں لوگوں کو بچانے کے لیے کارروائیوں میں مصروف ہیں۔

جیجو ایئرلائن کے ترجمان نے کہا کہ ایئرلائن حادثے کے بارے میں مختلف رپورٹس کی جانچ کر رہی ہے جب کہ ایوی ایشن ٹریکنگ سائٹ فلائٹ راڈار 24 سے معلوم ہوا ہے کہ حادثے کا شکار ہونے والا جہاز بوئنگ طیارہ 737/800 معلوم ہوتا ہے تاہم بوئنگ نے فوری طور پر تبصرے کی درخواست کا جواب نہیں دیا، جنوبی کوریا کے قائم مقام صدر چوئی سانگ موک کے دفتر سے جاری بیان میں کہا گیا کہ انہوں نے ریسکیو کی ہرممکن کارروائی کا حکم دیا ہے، قائم مقام صدر کے چیف آف سٹاف نے ہنگامی اجلاس طلب کرلیا۔