اسلام آباد (نیوزڈیسک) سکیورٹی فورسز نے سرحد پر کارروائی کرتے ہوئے افغانستان سے غیر ملکی اسلحے کی بڑی کھیپ پاکستان میں سمگل کرنے کی کوشش ناکام بنا دی۔ میڈیا رپورٹس کے مطابق سکیورٹی ذرائع کا کہنا ہے کہ فورسز نے پاک افغان سرحد سے متصل غلام خان بارڈر ٹرمینل پر اسلحہ بردار ٹرک قبضے میں لیا جس سے جدید ساخت کا غیرملکی اسلحہ اور میگزین برآمد ہوئے، غیرملکی اسلحے میں 26 ایم 16 رائفلیں، ایم 16 اور ایم 4 رائفلوں کے 292 میگزین و 10 ہزار سے زائد گولیاں شامل ہیں، اس کے علاوہ کلاشنکوف کی 9 میگزین اور 244 گولیاں بھی برآمد ہوئیں، ٹرک سے لائٹ مشین گن کی 744 گولیاں اور بڑی تعداد میں لنکرز بھی برآمد ہوئے۔
بتایا گیا ہے کہ برآمد ہونے والا اسلحہ ٹرک میں ڈرائیور کیبن میں خفیہ مقام پر چھپایا گیا تھا، غیر ملکی اسلحہ چھپانے کے لیے ٹرک میں چھپے ہوئے کمپارٹمنٹس بنانے کا کام اور سامان کی پیکنگ افغانستان میں ہوئی، یہ برآمد شدہ ہتھیار اور گولہ بارود پاکستان میں دہشت گردی کے لیے استعمال کیے جانے والے تھے، اس سے پہلے بھی متعدد بار پاکستان میں دہشت گردی کے واقعات میں فتنہ الخوارج کے خارجیوں سے غیر ملکی اسلحہ برآمد ہوا۔

سکیورٹی ذرائع نے کہا ہے کہ فتنہ الخوارج سے غیرملکی اسلحے کا بے دریغ استعمال اس بات کا ثبوت ہے کہ افغان سرزمین پاکستان کے خلاف دہشت گردی میں مسلسل استعمال ہو رہی ہے، افغان طالبان اور فتنتہ الخوارج پاکستان میں دہشت گردی کے لیے افغان سرزمین کے استعمال کی تردید کرتے ہیں مگر حقیقت اس کے برعکس ہے، افغان چیک پوسٹوں کی جانب سے فتنتہ الخوراج کو سہولت کاری فراہم کی جا رہی ہے، فتنتہ الخوارج کی قیادت اور اس سے منسلک دہشت گردوں کی افغانستان میں موجودگی ملی بھگت کا واضح ثبوت ہے۔