اسلام آباد(نیوزڈیسک)پاکستان پیپلز پارٹی کے چیئرمین بلاول بھٹو زرداری نے کہا ہے کہ 26 ویںآئینی ترمیم کو پارلیمنٹ کے سوا کوئی ادارہ ختم نہیں کر سکتا، سپریم کورٹ کا بینچ ہو یا آئینی بینچ انہیں آئین اور قانون کو ماننا پڑے گا، 26 ویں آئینی ترمیم کا معاملہ نہیں اب یہ روایت بن چکی ہے ، 26 ویں ترمیم کے رول بیک کا اختیار صرف پارلیمان کو ہے،اسلا م آباد میں میڈیا سے گفتگو کرتے ہوئے چیئرمین پیپلزپارٹی کا کہنا تھا کہ کوئی اور ادارہ آئین کو رول بیک کرے گا تو اسے نہ ہم مانیں گے نہ کوئی اور تسلیم کرے گا۔
سپریم کورٹ میں کوئی جج عہدے پر آئے تو دوسرے ججز کوآسانیاں پیدا کرنی چاہئیں مشکلات نہیں۔نئے چیف جسٹس کیلئے برادر ججز کو مشکلات کے بجائے آسانی پیدا کرنی چاہیے۔

وفاقی کابینہ کا حصہ بننے سے متعلق صحافی کے سوال پر بلاول بھٹو زرداری کا کہنا تھا ہم کابینہ کا حصہ نہیں بن رہے ۔وزیر اعظم شہباز شریف 5 سال وزیر اعظم رہ پائیں گے اس سوال پر بلاول بھٹو نے جواب دیا کہ انشا اللہ وزیراعظم شہباز شریف اپنے 5 سال مکمل کریں گے۔

انہوں نے کہا کہ پیکا ایکٹ پر میڈیا، ڈیجیٹل میڈیا نمائندوں سے مشاورت ہوتی تو بہتر ہوتا، حکومت کو کوئی بھی قدم اٹھانے سے پہلے اتفاق رائے پیدا کرنا چاہیے۔میڈیا سے گفتگو کرتے ہوئے چیئرمین پیپلزپارٹی بلاول بھٹو زرداری نے مزید کہا کہ میں امریکی صدر ڈونلڈ ٹرمپ کی دعوت پر ناشتے میں شرکت کروں گا۔ یہ سلسلہ ہماری والدہ کے دور سے چلتا آ رہا ہے۔
امریکی صدر ڈونلڈ ٹرمپ کی حلف برداری کی تقریب میں بھارتی وزیر خارجہ کو دعوت ملنے اور پاکستانی وزیر خارجہ کو نہ ملنے کے سوال پر بلاول بھٹو نے کہا کہ ہر ملک کی اپنی خارجہ پالیسی ہوتی ہے۔ جیو پولیٹکس کے لحاظ سے امریکا اور چین کے حالات واضح ہیں، چین کے صدر کو حلف برداری کی تقریب میں شرکت کی دعوت دی گئی جس کے بعد ضروری تھا کہ بھارت کی طرف سے بھی نمائندگی ہو۔انہوں نے کہا کہ پاکستان کی خارجہ پالیسی اپنی جگہ قائم و دائم ہے۔ پاکستان کے نیوکلیئر اثاثے اور میزائل ٹیکنالوجی ذوالفقار علی بھٹو کا تحفہ اور بے نظیر بھٹو کی امانت ہے۔