لاہور(نیوزڈیسک)لاہور میں 5اکتوبر کو جلاﺅ گھیراﺅ اور تشدد کے مقدمات میں پولیس رپورٹ میں پی ٹی آئی رہنماءسلمان اکرم راجہ سمیت 7ملزمان کو قصور وار قرار دیدیاگیا،انسداد دہشتگردی عدالت لاہور میں 5 اکتوبر کو جلاو گھیراو اور تشدد کے تین مقدمات میں پی ٹی آئی رہنما سلمان اکرم راجہ، ضمیر جھنڈو اور علی امیتاز وڑائچ سمیت دیگر ملزمان کی عبوری ضمانتوں پر سماعت ہوئی۔
پولیس نے تھانہ اسلام پورہ کے مقدمے میں رپورٹ پیش کر دی جس میں پولیس نے سلمان اکرم راجہ سمیت 7 ملزمان کو قصوروار قرار دے دیا۔پی ٹی آئی رہنما سلمان اکرم راجہ سمیت دیگر ملزمان نے عدالت میں پیش ہو کر حاضری مکمل کروائی۔عدالت نے تھانہ مستی گیٹ اور لاری اڈا کے مقدمات میں تفتیش رپورٹ طلب کر لی۔

عدالت نے اسلام پورہ کے مقدمے میں آئندہ سماعت پر دلائل طلب کرتے ہوئے عبوری ضمانتوں میں 12 اپریل تک توسیع کر دی۔

واضح رہے کہ گزشتہ روز بھی سانحہ 9 مئی اورمسلم لیگ ن کا آفس جلانے کے دو مقدمات میں عدالت نے یاسمین راشد،اعجاز چوہدری، محمود الرشید،عمر سرفراز چیمہ سمیت 31 ملزمان پر فرد جرم عائد کر دی تھی۔ انسداد دہشتگردی عدالت میں نومئی اور ن لیگ کا دفتر جلانے کے مقدمات کی سماعت ہوئی تھی اس دوران پی ٹی آئی رہنماوں کو عدالت میں پیش کیا گیا تھا۔ یاسمین راشد،اعجاز چوہدری،محمود الرشید،عمر سرفراز چیمہ ودیگر ملزمان نے صحت جرم سے انکار کیا تھا۔
انسداد دہشتگردی عدالت لاہورنے دونوں مقدمات میں یاسمین راشد، عمر سرفراز چیمہ، اعجاز چوہدری اور میاں محمود الرشید پر فرد جرم عائد کی گئی تھی۔ عدالت نے ملزمان کے خلاف گواہوں کو شہادت کیلئے طلب کر لیاتھا۔عدالت نے دونوں مقدمات میں فرد جرم عائد کرتے ہوئے ملزمان کے خلاف گواہوں کو شہادت کیلئے طلب کر لیاتھا۔ بعدازاں انسداد دہشتگردی عدالت نے مزید کارروائی کوٹ لکھپت جیل میں کرنیکا حکم دیتے ہوئے سماعت 20 فروری تک ملتوی کر دی تھی۔