نئی دہلی (نیوزڈیسک) بھارت کی جانب سے اپنی بندرگاہوں کے ذریعے دیگر ممالک کو بھی پاکستان کی امپورٹ ایکسپورٹ روک دی گئی۔ میڈیا رپورٹس کے مطابق بھارت نے پاکستان کی بین الاقوامی تجارت پر وار کرتے ہوئے پاکستانی کنٹینرز لے کر آنے والے تیسرے ملکوں کے پرچم بردار بحری جہازوں کو بھی بھارتی بندرگاہ پر لنگر انداز ہونے سے روک دیا ہے اور پاکستانی درآمدات پر پابندی اور پرچم بردار بحری جہازوں کے بعد ٹرانزٹ کارگو والے جہازوں کو بھی لنگر انداز ہونے کی اجازت نہیں دی گئی۔
ذرائع کی جانب سے بتایا گیا ہے کہ تیسرے ملک کے لیے کارگو لے جانے والی شپنگ کمپنی آئی ای ایکس کے کنٹینرز بردار بحری جہاز کو برتھ فراہم کرنے سے انکار کیا گیا ہے، بھارتی حکام نے کہا ہے کہ پاکستانی کارگو لانے والے کسی جہاز کو بھارت کی بندرگاہ پر برتھ نہیں دی جائے گی۔

اقتصادی ماہرین کا کہنا ہے کہ بھارت کے ان اقدامات سے خطے کی لاجسٹکس کے علاوہ بین الاقوامی شپنگ انڈسٹری بھی متاثر ہوگی کیوں کہ بھارتی اقدام کی وجہ سے اب پاکستانی کارگو لے جانے والے جہازوں کو خصوصی سروس چلانا پڑے گی، اپنی تجارت کو جاری رکھنے کے لیے پاکستان کو ایسی شپنگ سروسز سے ایکسپورٹ امپورٹ کرنا ہوگی جو بھارت کی بندرگاہ استعمال نہیں کرتے۔

بتایا جارہا ہے کہ بھارت نے دبئی، سری لنکا اور دیگر ممالک کے کے راستے پہنچنے والی پاکستانی اشیاء پر بھی پابندی کی تیاری شروع کردی ہے، جس کا مقصد پاکستانی اشیاء پر براہ راست ہی نہیں بلکہ بالواسطہ تجارت پر بھی مکمل پابندی عائد کرنا ہے، اس پابندی کے ذریعے بھارت کا چاہتا ہے پاکستانی مال کو دوسرے ملکوں کے لیبل کے تحت بھی داخل ہونے سے روک دیا جائے۔