لاہور(نیوزڈیسک)پنجاب پولیس کی خاتون افسر ایس پی عائشہ بٹ نے بین الاقوامی سطح پر پاکستان کا پرچم بلند کر دیا، انہیں انٹرنیشنل ایسوسی ایشن آف ویمن پولیس کی جانب سے’’ایکسیلینس ان پرفارمنس ایوارڈ2025‘‘سے نوازا گیا ہے۔

پنجاب پولیس کے ترجمان کے مطابق یہ باوقار اعزاز سکاٹ لینڈ کے شہر گلاسگو میں منعقدہ 62 ویں سالانہ کانفرنس کے دوران ایس پی عائشہ بٹ کو دیا گیا، ایوارڈ کی تقریب میں دنیا بھر کے 40 سے زائد ممالک سے تعلق رکھنے والی 300 سے زائد خواتین پولیس افسران نے شرکت کی۔

تقریب میں آئی اے ڈبلو پی کی صدر جولیا جیگر نے ایس پی عائشہ بٹ کو ان کی شاندار کارکردگی کے اعتراف میں یہ عالمی اعزاز پیش کیا، یہ ایوارڈ ہر سال دنیا بھر سے صرف ایک ایسی خاتون پولیس افسر کو دیا جاتا ہے جو اپنے معاشرے میں نمایاں خدمات سرانجام دیتی ہے۔ایس پی عائشہ بٹ اس وقت سٹی ٹریفک آفیسر گوجرانوالہ کے طور پر خدمات انجام دے رہی ہیں، انہیں یہ ایوارڈ ٹریفک سیفٹی پولیسنگ، عوام اور پولیس کے درمیان اعتماد و روابط کو فروغ دینے اور فرائض کی ادائیگی میں مثالی کارکردگی کے اعتراف میں دیا گیا ہے۔