واشنگٹن (نیوزڈیسک)امریکی جریدے فارن افیئرز نے پاکستان کے مقابلے میں بھارت پر اِنحصار کی امریکی پالیسی کو ناکام قرار دے دیا۔امریکی جریدے کے مطابق بھارت کبھی بھی امریکا کا قابلِ بھروسہ شراکت دار نہیں رہا، بھارت امریکا کی توقعات پر پورا نہیں اترا، بھارت کے مقابلے میں پاکستان زیادہ قابلِ اعتماد شراکت دار ہے۔

امریکی میگزین نے اپنی رائے میں لکھا کہ اب امریکا کو پاکستان پر اعتماد کر کے دیکھنا ہو گا، ڈونلڈ ٹرمپ نے پاکستان کی دہشتگردی کے خلاف اقدامات اور بھارت سے کشیدگی میں کمی کی کوششوں کو سراہا ہے، امریکا اور پاکستان کے درمیان تجارتی و توانائی کے معاہدے دونوں ممالک کے لیے فائدہ مند ہیں۔امریکی میگزین کے مطابق ریکوڈک سمیت پاکستانی وسائل میں امریکی سرمایہ کاری خطے کو مستحکم بنا سکتی ہے۔جریدے کے مطابق بھارت پر یکطرفہ توجہ خطے میں دراڑیں اور جنگ کا خطرہ بڑھائے گی، بھارت پر مرکوز امریکی پالیسی پاکستان کو دور اور خطے میں واشنگٹن کو کمزور کرے گی۔امریکی میگزین نے کہا کہ پاکستان کی قومی سلامتی پالیسی میں امریکا اور چین کے ساتھ متوازن تعلقات پر زور ہے۔