اسلام آباد (نیوزڈیسک) وفاقی وزیرداخلہ محسن نقوی نے کہا ہے کہ فیڈرل کانسٹیبلری کو جدید بنیاد پر استوار کرکے ایک منظم اور انتہائی فعال فورس بنانا چاہتے ہیں ، اس کا ہیڈکوارٹر پشاور سے اسلام آباد منتقل کرنے کا اصولی فیصلہ کیا گیا ہے،انہوں نے ایف سی ہیڈ کوارٹر کے لیے زمین کی نشاندہی کی ہدایت کرتے ہوئے ہیڈ کوارٹر کا ماسٹر پلان بھی طلب کر لیا۔

وزارت داخلہ کے مطابق ان خیالات کا اظہار انہوں نے ہفتے کو سی ڈی اے ہیڈ کوارٹر میں اپنی زیر صدارت اجلاس کے دوران کیا جس میں وزیر مملکت برائے داخلہ امور طلال چوہدری ، سیکرٹری داخلہ، کمانڈنٹ و ڈپٹی کمانڈنٹ فیڈرل کانسٹیبلری، چیئرمین سی ڈی اے، آئی جی اسلام آبادپولیس، ڈی سی اسلام آباد اور سینئر حکام نے بھی شرکت کی۔ وزیر داخلہ نے کہا کہ فیڈرل کانسٹیبلری ہیڈکوارٹر کےلئے دارالحکومت میں موزوں جگہ مختص کی جائے،زمین کی نشاندہی کے دوران ہیڈکوارٹر اور ٹریننگ کی ضروریات کو خصوصی طور پر مد نظر رکھا جائے۔ محسن نقوی نے کہا کہ فیڈرل کانسٹیبلری کو جدید بنیاد پر استوار کرکے ایک منظم اور انتہائی فعال فورس بنانا چاہتے ہیں۔